(ហាណូយ)៖ នៅថ្ងៃអង្គារ​ ទី៥ ខែសីហា ប្រព័ន្ធផ្សព្វផ្សាយរដ្ឋវៀតណាម បានរាយការណ៍ថា ប្រទេសអាស៊ានមួយនេះ កំពុងជួបបញ្ហាឆ្លងរីករាលដាលនៃជំងឺប៉េស្តជ្រូកអាហ្រ្វិក (African swine fever) កាន់តែអាក្រក់ ដោយចំនួនសត្វជ្រូកសរុបដែលឆ្លងជំងឺ គឺបានកើនឡើងដល់ទៅជាង​៣ដង ក្នុងរយៈពេលត្រឹមតែ២សប្តាហ៍។ នេះបើតាមការចេញផ្សាយដោយ ទីភ្នាក់ងារព័ត៌មាន AFP។

កាសែត Tien Phong បាននិយាយថា ប្រទេសវៀតណាម បានរកឃើញការឆ្លងរាលដាលជំងឺប៉េស្តជ្រូកអាហ្រ្វិកចំនួន ៩៧២ករណី គិតត្រឹមពេលឥឡូវ នៅក្នុងឆ្នាំនេះ។ វាកើនពីចំនួន៥១៤ករណី ដែលត្រូវបានរាយការណ៍កាលពីពាក់កណ្តាលខែកក្កដា។ យោងតាម​ទិន្នន័យពីក្រសួងកសិកម្មវៀតណាម ចំនួនសត្វជ្រូកដែលឆ្លងជំងឺ បានកើនដល់ជាង១០០ ០០០ក្បាល ពី៣០ ០០០ក្បាល ក្នុងចន្លោះពេលដូចគ្នាខាងលើ។ សត្វជ្រូកទាំងអស់នោះបានងាប់ដោយខ្លួនឯង ឬក៏ត្រូវបានសម្លាប់ចោល។

គួរបញ្ជាក់ថា ជំងឺប៉េស្តជ្រូកអាហ្រ្វិកធ្លាប់បង្កការរាំងស្ទះ ចំពោះទីផ្សារសាច់ជ្រូកពិភពលោក អស់រយៈពេលជាច្រើនឆ្នាំមកហើយ។ កាលពីអំឡុង​ការឆ្លងរីករាលដាលដ៏អាក្រក់បំផុត គឺឆ្នាំ២០១៨-២០១៩ ចំនួនសត្វជ្រូកចិញ្ចឹមក្នុងស្រុកជាងពាក់កណ្តាល បានងាប់នៅក្នុងប្រទេសចិន ដែលជាប្រទេសផលិតសាច់ជ្រូកច្រើនជាងគេ ជាហេតុនាំឱ្យមានការខាតបងគិតជាទឹកប្រាក់ ស្មើនឹងជាង​១០០ពាន់លានដុល្លារ។

ការឆ្លងរាតត្បាតជំងឺប៉េស្តជ្រូកអាហ្រ្វិកនៅវៀតណាម កាលពីខែមុន បានជំរុញឱ្យនាយករដ្ឋមន្រ្តី លោក Pham Minh Chinh ចេញសេចក្តីណែនាំបន្ទាន់មួយ ទៅកាន់បណ្តាទីភ្នាក់ងារខេត្តនិងរដ្ឋាភិបាល ឱ្យចាត់វិធានការដើម្បីទប់ស្កាត់ជំងឺនេះ ដែលរដ្ឋាភិបាល​និយាយថា កំពុងគំរាមកំហែងចំពោះខ្សែចង្វាក់ផ្គត់ផ្គង់ស្បៀងអាហារនៅក្នុងស្រុក៕