(អូតាវ៉ា)៖ កាណាដា បានប្រកាសពីការចែកចាយជំនួយមនុស្សធម៌ ដោយទម្លាក់ពីលើអាកាសចូលក្នុងតំបន់ហ្កាហ្សា ដែលស្ថិតក្រោមការវាយប្រហារជិត ២២ខែ ជាមួយនិងការចោទប្រកាន់អ៉ីស្រាអែល ថាកំពុងបំពានច្បាប់អន្តរជាតិ។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃអង្គារ ទី៥ ខែសីហា ឆ្នាំ ២០២៥។

រដ្ឋាភិបាលកាណាដា គូសបញ្ជាក់ក្នុងសេចក្តីថ្លែងការណ៍ថា «កងកម្លាំងប្រដាប់អាវុធ ប្រើប្រាស់យន្តហោះយោធា Hercules ធុន CC-130J ដើម្បីទម្លាក់កញ្ចប់ជំនួយមនុស្សធម៌ ទៅកាន់តំបន់ហ្កាហ្សា ទម្ងន់ជិត ១ ០០០គីឡូក្រាម»។ សេចក្តីថ្លែងការណ៍ដដែល បានឱ្យដឹងថា ការរឹតបន្តឹងរបស់អ៉ីស្រាអែល បង្កនូវបញ្ហាប្រឈមសម្រាប់ទីភ្នាក់ងារមនុស្សធម៌ និងជាសកម្មភាពបំពានច្បាប់អន្តរជាតិ ហើយត្រូវតែបញ្ឈប់ជាបន្ទាន់។

ស្ថានទូតអ៉ីស្រាអែល ក្នុងទីក្រុងអូតាវ៉ា មិនទាន់មានការឆ្លើយតបទេ ចំពោះសេចក្តីថ្លែងការណ៍នេះ ប៉ុន្តែកន្លងមកអ៉ីស្រាអែល បដិសេធការចោទប្រកាន់ពីការបំពានច្បាប់អន្តរជាតិ ហើយបន្ទោសក្រុមហាម៉ាស សម្រាប់ភាពអត់ឃ្លាននៅហ្កាហ្សា៕