(វ៉ាស៊ីនតោន)៖ អនុអធិការបតី និងជារដ្ឋមន្ត្រីហិរញ្ញវត្ថុអាល្លឺម៉ង់ លោក Lars Klingbeil កាលពីថ្ងៃចន្ទបានរិះគន់យ៉ាងខ្លាំងថា សហភាពអឺរ៉ុប (EU) មានជំហរ «ទន់ជ្រាយពេក» ក្នុងការចរចាជាមួយសហរដ្ឋអាមេរិកជុំវិញបញ្ហាពន្ធនាំចូលថ្មី។ នេះបើយោងតាមការចេញផ្សាយដោយ ទីភ្នាក់ងារសារព័ត៌មាន Xinhua។

ថ្លែងនៅក្នុងអំឡុងពេលបំពេញទស្សនកិច្ចនៅទីក្រុងវ៉ាស៊ីនតោន លោក Klingbeil បានប្រាប់អ្នកសារព័ត៌មាន មុនពេលជំនួបជាមួយរដ្ឋមន្ត្រីរតនាគារអាមេរិក លោក Scott Bessent យ៉ាងដូច្នេះថា «ខ្ញុំគិតថាយើងទន់ជ្រាយពេក។ យើងមិនអាចពេញចិត្តនឹងលទ្ធផលដែលសម្រេចបាននោះទេ»។

ការលើកឡើងរបស់លោក គឺសំដៅទៅលើកិច្ចព្រមព្រៀងដែលបានសម្រេចកាលពីខែមុន រវាងប្រធានគណៈកម្មការអឺរ៉ុប លោកស្រី Ursula von der Leyen និងប្រធានាធិបតីអាមេរិក លោក ដូណាល់ ត្រាំ។ នៅក្រោមកិច្ចព្រមព្រៀងនោះ ទំនិញនាំចូលភាគច្រើនរបស់ EU ទៅកាន់សហរដ្ឋអាមេរិក នឹងត្រូវប្រឈមមុខនឹងពន្ធ ១៥ភាគរយ ស្របពេលដែលប្លុកនេះនឹងទិញផលិតផលថាមពលរបស់អាមេរិកកាន់តែច្រើន និងបង្កើនការវិនិយោគនៅទីនោះ។

គួរបញ្ជាក់ថា កិច្ចព្រមព្រៀងនេះត្រូវបានរិះគន់នៅទូទាំងអឺរ៉ុប។ ជាក់ស្តែង ត្រឹមតែមួយថ្ងៃបន្ទាប់ពីកិច្ចព្រមព្រៀងត្រូវបានប្រកាស អធិការបតី Friedrich Merz បានព្រមានថា កិច្ចព្រមព្រៀងនេះនឹងបង្ក «ការខូចខាតយ៉ាងធ្ងន់ធ្ងរ» ដល់សេដ្ឋកិច្ចអឺរ៉ុប។ លោកបានបន្ថែមថា «ផលប៉ះពាល់អវិជ្ជមានរបស់វា នឹងមិនត្រឹមតែមានកម្រិតនៅត្រឹមអាល្លឺម៉ង់ និងអឺរ៉ុបប៉ុណ្ណោះទេ ប៉ុន្តែយើងនឹងឃើញផលប៉ះពាល់នៃគោលនយោបាយពាណិជ្ជកម្មនេះនៅអាមេរិកផងដែរ»៕