លោក ហ្សេលេនស្គី ថាមានកិច្ចសន្ទនាប្រកបដោយផ្លែផ្កាជាមួយលោក ត្រាំ មុនឱសានវាទបទឈប់បាញ់ផុតកំណត់ (Video inside)
06-08-2025 08:47
(កៀវ)៖ ប្រធានាធិបតីអ៊ុយក្រែន លោក វ៉ូឡូឌីមៀ ហ្សេលេនស្គី បាននិយាយនៅថ្ងៃអង្គារ ទី៥ ខែសីហា ថារូបលោកមានកិច្ចសន្ទនាប្រកបដោយផ្លែផ្កាជាមួយលោកប្រធានាធិបតីអាមេរិក ដូណាល់ ត្រាំ អំពីការបិទបញ្ចប់សង្រ្គាម ការដាក់ទណ្ឌកម្មលើរុស្ស៉ី និងកិច្ចព្រមព្រៀងដ្រូនរវាងសហរដ្ឋអាមេរិក និងអ៊ុយក្រែន។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters។
ដោយចង់សំដៅលើការបង្កើនការវាយប្រហារដោយដ្រូន និងមីស៊ីលពីសំណាក់រុស្ស៉ីលើបណ្ដាក្រុងរបស់អ៊ុយក្រែន លោក ហ្សេលេនស្គី បានសរសេរលើបណ្ដាញទំនាក់ទំនងសង្គម X ថា «លោកប្រធានាធិបតី ត្រាំ ទទួលបានការជូនដំណឹងទាំងស្រុងអំពីការវាយប្រហាររបស់រុស្ស៉ីលើទីក្រុងកៀវ និងទីក្រុងដទៃទៀត»។ លោក ត្រាំ មួយរយៈពេលចុងក្រោយនេះបានបង្ហាញ ការខកចិត្តយ៉ាងខ្លាំងចំពោះលោកប្រធានាធិបតីរុស្ស៉ី លោក វ្ល៉ាឌីមៀ ពូទីន ជាមួយការដាក់ឱសានវាទឱ្យមេដឹកនាំវិមានក្រឹមឡាំងរហូតដល់ថ្ងៃទី៨ ខែសីហា ដើម្បីទទួលយកបទឈប់បាញ់ ជាមួយអ៊ុយក្រែន បើពុំដូច្នោះទេនឹងត្រូវប្រឈមមុខនឹងទណ្ឌកម្មធ្ងន់ធ្ងរ។
គួរបញ្ជាក់ថា បើតាម Reuters ដោយផ្អែកលើប្រភពពីមន្ត្រីអាមេរិកម្នាក់ បេសកជនពិសេសអាមេរិក លោក Steve Witkoff នឹងត្រូវជួបជាមួយមេដឹកនាំរុស្ស៉ី ក្នុងទីក្រុងមូស្គូ នៅថ្ងៃពុធសប្ដាហ៍នេះ៕