(មូស្គូ)៖ នៅថ្ងៃពុធ ទី៦ ខែសីហា ប្រព័ន្ធផ្សព្វផ្សាយរុស្ស៉ី Interfax បានរាយការណ៍ថា កងនាវាយោធាជើងទឹករុស្ស៉ីនិងចិន នឹងបំពេញបេសកកម្មល្បាតរួមគ្នា នៅតំបន់អាស៉ី-ប៉ាស៉ីហ្វិក ក្រោយទើបតែធ្វើសមយុទ្ធរួមនៅសមុទ្រជប៉ុន។ នេះបើតាមការចេញផ្សាយដោយ ទីភ្នាក់ងារព័ត៌មាន Reuters។

ដោយផ្អែកលើសេចក្តីថ្លែងការណ៍ពីអង្គភាពព័ត៌មាន នៃកងកម្លាំងជើងទឹករុស្ស៉ីប្រចាំប៉ាស៉ីហ្វិក Interfax បាននិយាយថា កងទ័ពជើងទឹករុស្ស៉ីនិងចិន នឹងចល័តកងនាវាដើម្បីបំពេញបេសកកម្មល្បាតរួមគ្នា នៅតំបន់អាស៉ី-ប៉ាស៉ីហ្វិក។ កាលពីថ្ងៃទី១ ដល់ថ្ងៃទី៥ ខែសីហា កងទ័ពជើងទឹកទាំងពីរ ទើបតែបានធ្វើសមយុទ្ធយោធារួមគ្នា នៅតំបន់សមុទ្រជប៉ុន ហើយអំឡុងដំណាក់កាលចុងក្រោយនៃសមយុទ្ធ នាវាចម្បាំងរុស្ស៉ីនិងចិន ក៏បានធ្វើលំហាត់បាញ់គ្រាប់ពិតផងដែរ។ កងកម្លាំងជើងទឹករុស្ស៉ីប្រចាំនៅប៉ាស៉ីហ្វិក បាននិយាយថា សមយុទ្ធជាមួយចិននោះ គឺដើម្បីពង្រឹងការការពារខ្លួន ដោយមិនមានគោលដៅប្រឆាំងប្រទេសដទៃផ្សេងទេ។

គួរបញ្ជាក់ថា រុស្ស៉ីនិងចិនដែលបានប្រកាសភាពជាដៃគូ «គ្មានដែនកំណត់» កាលពីអំឡុងដើមឆ្នាំ២០២២ តែងរួមគ្នាធ្វើសមយុទ្ធយោធាជាប្រចាំ ដើម្បីពង្រឹងសមត្ថភាពធ្វើការជាមួយគ្នា រវាងកងកម្លាំងយោធានៃប្រទេសទាំងពីរ ហើយត្រូវគេមើលឃើញថា ជាការបញ្ជូនសញ្ញាដើម្បីកំញើញគូបដិបក្ខ៕