(ប្រេតូរីយ៉ា)៖ កាលពីថ្ងៃអង្គារ ទី៥ ខែសីហា រដ្ឋមន្រ្តីការបរទេសអាហ្រ្វិកខាងត្បូង លោក Ronald Lamola បានលើកឡើងថា ប្រទេសជាច្រើនថែមទៀត ចាំបាច់ត្រូវទទួលស្គាល់រដ្ឋប៉ាឡេស្ទីន ហើយក្រោកឈរប្រឆាំងសកម្មភាពបែបប្រល័យពូជសាសន៍របស់អ៉ីស្រាអែល។ នេះបើតាមការចេញផ្សាយដោយ ទីភ្នាក់ងារព័ត៌មាន AFP។

អាហ្រ្វិកខាងត្បូងគឺជាប្រទេសមួយដែលបានរិះគន់ខ្លាំងៗ និងប្រឆាំងយ៉ាងមុតមាំចំពោះសកម្មភាពរបស់អ៉ីស្រាអែលនៅតំបន់ហ្កាហ្សា ដោយបានបញ្ជូនសំណុំរឿងទៅកាន់ តុលាការកំពូលរបស់អង្គការសហប្រជាជាតិ (UN) កាលពីខែធ្នូ ឆ្នាំ២០២៣ ដោយចោទថា សង្រ្គាមរបស់អ៉ីស្រាអែលនៅដែនដីប៉ាឡេស្ទីននោះ ស្មើនឹងការប្រព្រឹត្តអំពើប្រល័យពូជសាសន៍។ ប្រទេសមួយចំនួន ក៏បានចូលរួម​បង្ហាញការគាំទ្រសំណុំរឿងរបស់អាហ្រ្វិកខាងត្បូងផងដែរ ដូចជាអេស៉្បាញ បូលីវី កូឡុំប៊ី ម៉ិកស៉ិក តួកគីយ៉េ ស៉ីលី និងលីប៊ី។

ដោយឡែក នាពេលថ្មីៗនេះ បារាំង ចក្រភពអង់គ្លេស និងកាណាដា បាននិយាយថា ពួកគេគ្រោងទទួលស្គាល់រដ្ឋប៉ាឡេស្ទីន នៅខែកញ្ញា ហើយបានទទូចឱ្យប្រទេសដទៃទៀតធ្វើដូចគ្នា។ លោក Lamola បាននិយាយថា «យើងពិតជាស្វាគមន៍ស្ថានការណ៍វិវត្តន៍នេះ ហើយយើងអំពាវនាវឱ្យប្រទេសច្រើនថែមទៀត បន្តចូលរួមទទួលស្គាល់ប៉ាឡេស្ទីន»។

គួរបញ្ជាក់ថា អ៉ីស្រាអែលបានធ្វើសង្រ្គាមនៅហ្កាហ្សា ដើម្បីសងសឹកការឆ្មក់វាយប្រហារដ៏ភ្ញាក់ផ្អើលរបស់ក្រុមសកម្មប្រយុទ្ធប៉ាឡេស្ទីន ដឹកនាំដោយហាម៉ាស កាលពីថ្ងៃទី៧ ខែតុលា ឆ្នាំ២០២៣។ សង្រ្គាមរបស់អ៉ីស្រាអែល គិតមកទល់ពេលនេះ បានសម្លាប់មនុស្សលើស៦០ ០០០នាក់ ហើយតំបន់ហ្កាហ្សា បានរងការបំផ្លិចបំផ្លាញហិនហោចសឹងតែទាំងស្រុង ខណៈប្រជាជនប៉ាឡេស្ទីននៅទីនោះ កំពុងជួបវិបត្តិមនុស្សធម៌យ៉ាងធ្ងន់ធ្ងរ។ សំណុំរឿងរបស់អាហ្រ្វិកខាងត្បូង ដែលដាក់ទៅតុលាការយុត្តិធម៌អន្តរជាតិ ICJ ចោទថា សង្រ្គាមរបស់អ៉ីស្រាអែល បំពានអនុសញ្ញាស្តីពីអំពើប្រល័យពូជសាសន៍ឆ្នាំ១៩៤៨ របស់ UN ប៉ុន្តែអ៉ីស្រាអែលបដិសេធយ៉ាងដាច់អហង្ការ៕