(វ៉ាស៉ីនតោន)៖ កាលពីថ្ងៃអង្គារ ទី៥ ខែសីហា ប្រធានាធិបតីសហរដ្ឋអាមេរិក លោក ដូណាល់ ត្រាំ បានបង្ហាញតំរុយថា អនុប្រធានាធិបតី លោក JD Vance ទំនងនឹងក្លាយជាអ្នកបន្តវេនពីរូបលោក សម្រាប់បេក្ខភាពប្រធានាធិបតីបក្សសាធារណរដ្ឋ នៅឆ្នាំ២០២៨។ នេះបើតាមការចេញផ្សាយដោយ ទីភ្នាក់ងារព័ត៌មាន Reuters។

នៅពេលត្រូវបានសាកសួរពីក្រុមអ្នកកាសែតថា តើលោក Vance នឹងជាអ្នកបន្តវេននៃចលនាដែលលោក ត្រាំ បានផ្តួចផ្តើមឡើងឬ លោកប្រធានាធិបតីអាមេរិក បានឆ្លើយតបដូច្នេះថា «ខ្ញុំយល់ថា វាមានលទ្ធភាពខ្ពស់ ព្រោះបើនិយាយឱ្យយុត្តិធម៌ទៅ គឺលោក Vance ជាអនុប្រធានាធិបតីរបស់ខ្ញុំ»។ លើសពីនេះ លោក ត្រាំ ក៏បានឱ្យយោបល់ថា លោក Vance និងរដ្ឋមន្រ្តីការបរទេសអាមេរិក លោក Marco Rubio រួមកម្លាំងគ្នា ដើម្បីឈរជាបេក្ខជនប្រធានាធិបតី និងបេក្ខជនអនុប្រធានាធិបតីបក្សសាធារណរដ្ឋ ក្នុងការបោះឆ្នោតនាពេលអនាគតផងដែរ។

ស្របពេលការបោះឆ្នោតប្រធានាធិបតីអាមេរិកឆ្នាំ២០២៨ នៅសល់រយៈពេលយូរឆ្ងាយទៀតក៏ដោយ លោក ត្រាំ ក្តោបក្តាប់ឥទ្ធិពលធំ ក្នុងចំណោមក្រុមអ្នកគាំទ្រស្នូលរបស់បក្សសាធារណរដ្ឋ ដូច្នេះហើយសញ្ញាណាមួយដែលបង្ហាញថា រូបលោកគាំទ្របេក្ខជនណាម្នាក់នោះ គឺមានសារសំខាន់ជាខ្លាំង។ ពីមុនមកលោក ត្រាំ ធ្លាប់បានបដិសេធបង្ហាញការគាំទ្រចំពោះអ្នកបន្តវេន សម្រាប់ការបោះឆ្នោតឆ្នាំ២០២៨។ កាលពីខែកុម្ភៈ ឆ្នាំនេះ លោក ត្រាំ បានត្រឹមលើកឡើងថា លោក Vance ជាមនុស្សមានសមត្ថភាពខ្ពស់ម្នាក់ ប៉ុន្តែវាហាក់ដូចជាឆាប់ពេក ក្នុងការជ្រើសរើសលោក ជាបេក្ខជននាំមុខគេ។

លោក Vance វ័យ៤០ឆ្នាំ បានដើរតួនាទីយ៉ាងសំខាន់ ក្នុងរដ្ឋបាលនៃអាណត្តិទី២របស់លោក ត្រាំ ដោយបម្រើជា​អ្នកការទូតគន្លឹះម្នាក់ និងជាអ្នកតំណាងកំពូលមួយរូប ក្នុងការលើកកម្ពស់គោលនយោបាយក្នុងស្រុករបស់លោក ត្រាំ នៅក្នុងសហរដ្ឋអាមេរិកផ្ទាល់ និងគោលនយោបាយការបរទេស នៅក្រៅប្រទេស។ រីឯលោក Rubio វិញវ័យ៥៤ឆ្នាំ គឺជាអតីតសមាជិកព្រឹទ្ធសភា ហើយក៏បានលេចធ្លោជាបុគ្គលដ៏សំខាន់ខ្លាំងមួយរូប ក្នុងរដ្ឋបាលអាមេរិកមួយ ដែលបានចំណាយពេល​ច្រើន ដោះស្រាយបញ្ហាគោលនយោបាយការបរទេសរសើបៗ។ លោក Rubio គឺជាបុគ្គលដំបូងគេ គិតចាប់តាំងពីលោក Henry Kissinger ដែលកាន់តួនាទីជារដ្ឋមន្រ្តីការបរទេសផង និងជាទីប្រឹក្សាសន្តិសុខជាតិផង ក្នុងពេលតែមួយ។

គួរបញ្ជាក់ថា នៅក្រោមរដ្ឋធម្មនុញ្ញរបស់សហរដ្ឋអាមេរិក ប្រធានាធិបតីអាចកាន់អំណាច បានត្រឹម២អាណត្តិប៉ុណ្ណោះ ដូច្នេះហើយ ក្រោយចប់អាណត្តិទី២នេះ លោក ត្រាំ នឹងមិនអាចបន្តឈរឈ្មោះបានទៀតទេ។ លោក ត្រាំ បានកាន់តំណែងជា​ប្រធានាធិបតីសម្រាប់អាណត្តិដំបូង កាលពីចន្លោះឆ្នាំ២០១៧-២០២១៕