(វ៉ាស៉ីនតោន)៖ មន្រ្តីអាមេរិកម្នាក់បានប្រាប់ Reuters ថាប្រធានាធិបតី លោក​ ដូណាល់ ត្រាំ នឹងទទួលស្វាគមន៍ មេដឹកនាំអាស៊ៃបៃហ្សង់ និងអាមេនី សម្រាប់កិច្ចពិភាក្សាសន្តិភាព នៅឯសេតវិមាន នាថ្ងៃសុក្រសប្តាហ៍នេះ។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃពុធ ទី៦​ ខែសីហា ឆ្នាំ ២០២៥។

មន្រ្តីដដែលបាននិយាយថា វាមានលទ្ធភាពដែលថាក្របខណ្ឌនៃកិច្ចព្រមព្រៀងមួយ ត្រូវបានប្រកាសក្នុងជំនួបនៅថ្ងៃសុក្រនោះ។ អាស៊ៃបៃហ្សង់ និងអាមេនី ដែលទទួលបានឯករាជ្យពីអតីតសហភាពសូវៀត ក្នុងឆ្នាំ ១៩៩១ មានជម្លោះនឹងគ្នាតាំងពីឆ្នាំ ១៩៨០ នៅពេលដែលតំបន់ Nagorno-Karabakh ជាតំបន់មួយរបស់អាស៊ៃបៃហ្សង់ និងមានប្រជាជនអាមេនីភាគច្រើនរស់នៅ បានបំបែកខ្លួនចេញពីអាស៊ៃបៃហ្សង់ ក្រោមការគាំទ្រពីអាមេនី។ នៅឆ្នាំ ២០២៣ អាស៊ៃបៃហ្សង់ យកបានតំបន់ Karabakh ​មកវិញ នាំឱ្យប្រជាជនអាមេនី ១០០ ០០០នាក់ ភៀសខ្លូនចូលអាមេនី។

គួរបញ្ជាក់ថា កាលពីខែមីនា ភាគីទាំងពីរ បានឯកភាពលើសេចក្តីព្រាងនៃកិច្ចព្រមព្រៀងសន្តិភាព ប៉ុន្តែការរីកចម្រើនតាំងពីពេលនោះមក មានភាពយឺតយ៉ាវ។ មេដឹកនាំ​ប្រទេស ​បាន​ជួបពិភាក្សា​គ្នា​កាលពី​ខែកក្កដា​ ក្នុង​ទីក្រុង Abu Dhabi៕