(មូស្គូ)៖ បេសកជនអាមេរិក លោក Steve Witkoff បានជួបពិភាក្សាជាមួយប្រធានាធិបតីរុស្ស៊ី លោក វ៉្លាឌីមៀ ពូទីន នៅវិមានក្រឹមឡាំងកាលពីថ្ងៃពុធ។ កិច្ចពិភាក្សានេះបានកើតឡើង ត្រឹមតែពីរថ្ងៃមុនពេលផុតកំណត់នៃឱសានវាទដែលបានកំណត់ដោយប្រធានាធិបតី ដូណាល់ ត្រាំ ដែលទាមទារឲ្យរុស្ស៊ីយល់ព្រមលើកិច្ចព្រមព្រៀងសន្តិភាពនៅអ៊ុយក្រែន បើមិនដូច្នេះទេ នឹងត្រូវប្រឈមមុខនឹងទណ្ឌកម្មថ្មី។ នេះបើយោងតាមការចេញផ្សាយដោយ ទីភ្នាក់ងារសារព័ត៌មាន Reuters។

លោក Witkoff បានធ្វើដំណើរទៅកាន់ទីក្រុងមូស្គូ​ ក្នុងបេសកកម្មនាទីចុងក្រោយមួយ ដើម្បីស្វែងរកការទម្លុះភាពជាប់គាំងក្នុងសង្គ្រាមដែលអូសបន្លាយ ៣ឆ្នាំកន្លះមកហើយ។ ទីភ្នាក់ងារសារព័ត៌មានរុស្ស៊ីបានរាយការណ៍ថា កិច្ចពិភាក្សានេះបានបញ្ចប់ទៅវិញ បន្ទាប់ពីចំណាយពេលប្រហែល ៣ម៉ោង។

មកទល់ពេលនេះ មិនទាន់មានសេចក្តីថ្លែងការណ៍ណាមួយពីភាគីទាំងពីរអំពីខ្លឹមសារនៃកិច្ចពិភាក្សានៅឡើយទេ។

គួរបញ្ជាក់ថា លោក ត្រាំ ដែលកាន់តែបង្ហាញការមិនពេញចិត្តចំពោះលោក ពូទីន បានគំរាមដាក់ពន្ធយ៉ាងតឹងរ៉ឹងលើប្រទេសនានាដែលទិញទំនិញនាំចេញពីរុស្ស៊ី។ ទន្ទឹមនឹងនេះ របាយការណ៍ពី Bloomberg និង The Bell បានឱ្យដឹងថា វិមានក្រឹមឡាំង អាចនឹងស្នើឱ្យមានការផ្អាកការវាយប្រហារតាមផ្លូវអាកាសទៅវិញទៅមក ដែលជាគំនិតធ្លាប់លើកឡើងដោយប្រធានាធិបតីបេឡារុស្ស។

ទោះជាយ៉ាងណា ជំហររបស់អ៊ុយក្រែននៅតែដដែល ដោយប្រធានការិយាល័យប្រធានាធិបតីអ៊ុយក្រែន លោក Andriy Yermak បានបញ្ជាក់ថា អ្វីដែលត្រូវការគឺការឈប់បាញ់ទាំងស្រុង និងជំនួបកំពូលមេដឹកនាំ។ លោកបានសរសេរថា «សង្គ្រាមត្រូវតែបញ្ឈប់ ហើយសម្រាប់ពេលនេះ វាអាស្រ័យលើរុស្ស៊ី»៕