(វ៉ាស៊ីនតោន)៖ ប្រធានាធិបតីស្វីស លោកស្រី Karin Keller-Sutter នឹងជួបជាមួយរដ្ឋមន្ត្រីការបរទេសអាមេរិក លោក ម៉ាកូ រ៉ូប៊ីអូ នៅថ្ងៃពុធនេះ ដើម្បីស្វែងរកដំណោះស្រាយនាទីចុងក្រោយ ដែលអាចបញ្ចៀសពន្ធនាំចូលដ៏ធ្ងន់ធ្ងររហូតដល់ ៣៩% ពីសហរដ្ឋអាមេរិក។ នេះបើយោងតាមការចេញផ្សាយដោយ ទីភ្នាក់ងារសារព័ត៌មាន Reuters។

ប្រទេសស្វីសមានការភ្ញាក់ផ្អើលយ៉ាងខ្លាំង បន្ទាប់ពីការសម្រេចចិត្តរបស់ប្រធានាធិបតី ដូណាល់ ត្រាំ កាលពីសប្តាហ៍មុន ដែលបានកំណត់អត្រាពន្ធដ៏ខ្ពស់នេះ ដែលជាការគំរាមកំហែងយ៉ាងធ្ងន់ធ្ងរដល់សេដ្ឋកិច្ចរបស់ខ្លួនដែលពឹងផ្អែកលើការនាំចេញ។

យោងតាមប្រភពដែលដឹងពីបញ្ហានេះ រដ្ឋបាលលោក ត្រាំ កំពុងស្វែងរកឲ្យប្រទេសស្វីសទិញផលិតផលថាមពល និងការពារជាតិបន្ថែមទៀត។ ជាក់ស្តែង រដ្ឋមន្ត្រីពាណិជ្ជកម្មស្វីស លោក Guy Parmelin បានលើកឡើងពីលទ្ធភាពដែលស្វីសអាចនឹងទិញឧស្ម័នធម្មជាតិរាវ (LNG) ពីអាមេរិក ដើម្បីទទួលបានលក្ខខណ្ឌល្អប្រសើរជាងមុន។

គួរបញ្ជាក់ថា កាលពីខែមុន សហភាពអឺរ៉ុបបានសម្រេចបានអត្រាពន្ធត្រឹមតែ ១៥% បន្ទាប់ពីបានយល់ព្រមទិញផលិតផលថាមពលពីអាមេរិក ក្នុងទំហំទឹកប្រាក់ ៧៥០ពាន់លានដុល្លារ។ ទោះជាយ៉ាងណា ស្របពេលដែលរដ្ឋាភិបាលស្វីសកំពុងព្យាយាមចរចា អ្នកនយោបាយមួយចំនួនក្នុងប្រទេសបានអំពាវនាវឲ្យលុបចោលកិច្ចព្រមព្រៀងទិញយន្តហោះចម្បាំង F-35 ពីអាមេរិក ដើម្បីជាការតវ៉ាប្រឆាំងនឹងជម្លោះពាណិជ្ជកម្មនេះ៕