(វ៉ាស៊ីនតោន)៖ ប្រធានាធិបតី ដូណាល់ ត្រាំ បានប្រកាសដំឡើងពន្ធបន្ថែម ២៥ភាគរយទៀតទៅលើប្រទេសឥណ្ឌា កាលពីយប់ថ្ងៃពុធ ដើម្បីជា «ការពិន័យ» ចំពោះការដែលឥណ្ឌាបន្តនាំចូលប្រេងឆៅពីរុស្ស៊ី ដែលលោកចាត់ទុកថា ជាការផ្តល់មូលនិធិដល់សង្គ្រាមរបស់លោក វ៉្លាឌីមៀ ពូទីន នៅអ៊ុយក្រែន។ នេះបើយោងតាមការចេញផ្សាយដោយ ទីភ្នាក់ងារសារព័ត៌មាន Reuters។

ការដំឡើងពន្ធចុងក្រោយនេះ បានធ្វើឲ្យអត្រាពន្ធសរុបលើទំនិញឥណ្ឌាដែលនាំចូលមកសហរដ្ឋអាមេរិក កើនឡើងដល់ ៥០ភាគរយ ដែលខ្ពស់ជាងពន្ធលើចិន ២០ភាគរយ និងខ្ពស់ជាងពន្ធលើប៉ាគីស្ថាន ៣១ភាគរយ។ ពន្ធ «ពិន័យ» នេះនឹងចូលជាធរមានក្នុងរយៈពេល ២១ថ្ងៃទៀត។

នៅក្នុងបទបញ្ជាប្រតិបត្តិមួយ ដែលបានចុះហត្ថលេខានៅថ្ងៃដដែល, លោក ត្រាំ បានសរសេរថា «ខ្ញុំយល់ឃើញថារដ្ឋាភិបាលឥណ្ឌាបច្ចុប្បន្ន កំពុងនាំចូលប្រេងពីរុស្ស៊ី...ខ្ញុំយល់ឃើញថាវាចាំបាច់ក្នុងការដាក់ពន្ធបន្ថែមលើទំនិញនាំចូលពីឥណ្ឌា...»។

គួរបញ្ជាក់ថា ចំណាត់ការនេះ បានគំរាមកំហែងធ្វើឲ្យទំនាក់ទំនងរវាងសហរដ្ឋអាមេរិក និងឥណ្ឌាកាន់តែស្មុគស្មាញ ហើយបានកើតឡើងមិនយូរប៉ុន្មាន បន្ទាប់ពីមានរបាយការណ៍ថា នាយករដ្ឋមន្ត្រីឥណ្ឌា លោក នរិន្ទ្រា ម៉ូឌី នឹងទៅបំពេញទស្សនកិច្ចនៅប្រទេសចិនជាលើកដំបូងក្នុងរយៈពេលជាង ៧ឆ្នាំ នៅចុងខែនេះ។ ទំនាក់ទំនងរវាងអាមេរិក និងឥណ្ឌា កំពុងប្រឈមមុខនឹងវិបត្តិដ៏ធ្ងន់ធ្ងរបំផុតក្នុងរយៈពេលជាច្រើនឆ្នាំ បន្ទាប់ពីកិច្ចចរចាពាណិជ្ជកម្មបានបរាជ័យ។

ការសម្រេចចិត្តនេះផងដែរ បានកើតឡើងបន្ទាប់ពីបេសកជនកំពូលរបស់លោក ត្រាំ គឺលោក Steve Witkoff បានបើកកិច្ចពិភាក្សានៅទីក្រុងមូស្គូ ក្នុងគោលបំណងជំរុញឲ្យរុស្ស៊ីយល់ព្រមលើកិច្ចព្រមព្រៀងសន្តិភាពនៅអ៊ុយក្រែន។ លោក ត្រាំ បានគំរាមដំឡើងពន្ធលើរុស្ស៊ី និងដាក់ទណ្ឌកម្មបន្ទាប់បន្សំលើសម្ព័ន្ធមិត្តរបស់រុស្ស៊ី ប្រសិនបើលោកប្រធានាធិបតី វ៉្លាឌីមៀ ពូទីន មិនចាត់វិធានការបញ្ចប់សង្គ្រាមនៅអ៊ុយក្រែនទេ៕