(វ៉ាស៊ីនតោន)៖ ក្រុមហ៊ុនអាកាសចរណ៍អាមេរិក United Airlines បានផ្អាកការហោះហើររបស់ខ្លួននៅទូទាំងសហរដ្ឋអាមេរិក នៅយប់ថ្ងៃពុធ ទី៦ ខែសីហា ដោយសារតែបញ្ហាបច្ចេកវិទ្យា។ នេះបើតាមការចេញផ្សាយដោយសារព័ត៌មាន ABC News។

ក្នុងសេចក្ដីថ្លែងការណ៍មួយ United Airlines បានគូសបញ្ជាក់ថា «ដោយសារតែបញ្ហាបច្ចេកវិទ្យា យើងបានសម្រេចចិត្តផ្អាកការហោះហើរ...ហើយយើងរំពឹងថានឹងមានការពន្យារពេលជើងហោះហើរបន្ថែម នៅល្ងាចនេះ (ថ្ងៃពុធ) ខណៈយើងកំពុងដោះស្រាយបញ្ហា។ សុវត្ថិភាពគឺជាអាទិភាពកំពូលរបស់យើង។ យើងនឹងធ្វើការជាមួយអតិថិជនរបស់យើងដើម្បីនាំពួកគេទៅកាន់គោលដៅរបស់ពួកគេ»។

គួរបញ្ជាក់ថា នៅក្នុងការធ្វើបច្ចុប្បន្នភាពមួយ ក្រុមហ៊ុន United Airlines បានឱ្យដឹងថាប្រព័ន្ធរបស់ខ្លួនត្រឡប់មកដំណើរការវិញជាធម្មតា ប៉ុន្តែអ្នកដំណើរអាចនឹងត្រូវពន្យារពេលការចេញដំណើររបស់ពួកគេ ពេញមួយយប់ថ្ងៃពុធ។ មកទល់នឹងពេលនេះ មានជើងហោះហើរ ៨២៧ ត្រូវបានពន្យារពេល និង២៣ត្រូវបានលុបចោល។ តែយ៉ាងណាក៏ដោយ ក្រុមហ៊ុនអាកាសចរណ៍អាមេរិកមួយនេះបានអះអាងថា បញ្ហាបច្ចេកវិទ្យាដែលបានកើតឡើងមិនមែនដោយសារការវាយប្រហារសាយប័រនោះទេ៕