(វ៉ាស៊ីនតោន)៖ ប្រធានាធិបតីអាមេរិក លោក ដូណាល់ ត្រាំ បាននិយាយនៅថ្ងៃពុធ ទី៦ ខែសីហា ថារូបលោកអាចនឹងជួបលោកប្រធានាធិបតីរុស្ស៉ី វ្ល៉ាឌីមៀ ពូទីន ក្នុងពេលឆាប់ៗ បន្ទាប់ពីអ្វី ដែលលោកហៅថាជាកិច្ចពិភាក្សាប្រកបដោយផ្លែផ្កាក្នុងទីក្រុងមូស្គូ រវាងបេសកជនពិសេសរបស់លោក និងលោក ពូទីន។ នេះបើតាមការចេញផ្សាយដោយទីភ្នាក់ងារសារព័ត៌មាន AFP។

ការប្រកាសខាងលើរបស់លោក ត្រាំ ធ្វើឡើងបន្ទាប់ពីលោកប្រធានាធិបតីអាមេរិកបើកកិច្ចពិភាក្សាតាមទូរស័ព្ទជាមួយប្រធានាធិបតីអ៊ុយក្រែន លោក វ៉ូឡូឌីមៀ ហ្សេលេនស្គី។ នៅពេលត្រូវបាន សាកសួរថាតើនៅពេលណា ទើបរូបលោកនឹងជួបមេដឹកនាំរុស្ស៉ី និងអ៊ុយក្រែ​ន លោក ត្រាំ បានឆ្លើយថា «វាមានឱកាសល្អមួយដែលនឹងមានកិច្ចប្រជុំមួយក្នុងពេលឆាប់ៗ»។ លោក ត្រាំ មិនបាន ផ្ដល់ព័ត៌មានលម្អិតថាតើនឹងជួបលោក ពូទីន នៅទីណាទេ។ តែប្រសិនបើជំនួបកំពូលនេះកើតឡើងពិតមែន នោះវានឹងក្លាយជាលើកដំបូងបំផុតដែលមេដឹកនាំនៃប្រទេសទាំង២បានជួបគ្នាក្នុង កិច្ចប្រជុំកំពូលមួយ ចាប់តាំងពីលោក ចូ បៃដិន បានជួបលោក ពូទីន ក្នុងទីក្រុងហ្សឺណែវ ប្រទេសស្វីស កាលពីខែមិថុនា ឆ្នាំ២០២១។

គួរបញ្ជាក់ថា សារព័ត៌មានអាមេរិក New York Times និង CNN ក៏បានរាយការណ៍ដោយផ្អែកលើប្រភពពីក្រុមមន្ត្រីអាមេរិកដែរថាលោក ត្រាំ មានគម្រោងអង្គុយទល់មុខពិភាក្សាជាមួយលោក ពូទីន អាចនៅសប្ដាហ៍ក្រោយ ហើយក្រោយមកលោកប្រធានាធិបតីអាមេរិក ចង់រៀបចំកិច្ចប្រជុំត្រីភាគីជាមួយលោក ពូទីន និងលោក ហ្សេលេនស្គី។ លោក ត្រាំ បានដាក់ឱសានវាទត្រឹមថ្ងៃទី៨ ខែសីហា ដើម្បីឱ្យលោក ពូទីន យល់ព្រមលើបទឈប់បាញ់ជាមួយអ៊ុយក្រែន បើពុំដូច្នោះទេ លោកនឹងដាក់ទណ្ឌកម្មយ៉ាងធ្ងន់ធ្ងរលើរុស្ស៉ី៕