(Reuters)៖ លោក Myint Swe ដែលបានក្លាយជាប្រធានាធិបតីស្ដីទីមីយ៉ាន់ម៉ា អំឡុងរដ្ឋប្រហារឆ្នាំ២០២១ ទម្លាក់រដ្ឋាភិបាលស្របច្បាប់របស់លោកស្រី Aung San Suu Kyi ចេញពីតំណែង បានទទួលមរណភាពហើយ ក្នុងវ័យ ៧៤ឆ្នាំ។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters។

Reuters ដោយផ្អែកលើសេចក្ដីរាយការណ៍របស់ប្រព័ន្ធផ្សព្វផ្សាយរដ្ឋមីយ៉ាន់ម៉ា​ បានឱ្យដឹងថាលោក Myint Swe បានទទួលមរណភាពនៅក្នុងមន្ទីរពេទ្យមួយនៅព្រឹកថ្ងៃព្រហស្បតិ៍ ទី៧ ខែសីហា ដោយសាររោគាពាធ។ អតីតឧត្តមសេនីយ៍រូបនេះត្រូវបានតែងតាំងជាប្រធានាធិបតីស្ដីទី បន្ទាប់ពីប្រធានាធិបតី លោក Win Myint ត្រូវបានចាប់ខ្លួនរួមជាមួយលោកស្រី Aung San Suu Kyi អំឡុងរដ្ឋប្រហារយោធា ហើយអ្នកទាំង២ កំពុងជាប់ឃុំមកទល់នឹងសព្វថ្ងៃ។

លោក Myint Swe ធ្លាប់កាន់តំណែងជាអនុប្រធានាធិបតី នៅក្រោមរដ្ឋាភិបាលពាក់កណ្ដាលស៊ីវិល មុននឹងត្រូវបានតែងតាំងជាប្រធានាធិបតីស្ដីទី។ របបសឹកបានពឹងផ្អែកលើរូបលោកដើម្បីចេញ ក្រឹតនានា និងផ្ដល់ភាពស្របច្បាប់ដល់របបរបស់ខ្លួន។ លោកបានសម្រាកព្យាបាលជំងឺ កាលពីខែកក្កដា ឆ្នាំ២០២៤ ជាមួយការផ្ទេរភារកិច្ចទៅឱ្យមេដឹកនាំរបបសឹកលោក Min Aung Hlaing។

កាលពីសប្ដាហ៍មុន យោធាមីយ៉ាន់ម៉ាបានផ្ទេរអំណាចទៅឱ្យរដ្ឋាភិបាលស៊ីវិលបណ្ដោះអាសន្នមួយ ដើម្បីរៀបចំការបោះឆ្នោតសកលនៅក្នុងឆ្នាំ២០២៥នេះ ហើយលោក Min Aung Hlaing ត្រូវកាន់តំណែងជាប្រធានាធិបតីស្ដីទី៕