(គូឡាឡាំពួ)៖ អំឡុងការបំពេញព្រះរាជទស្សនកិច្ចផ្លូវរដ្ឋនៅទីក្រុងមូស្គូ ព្រះមហាក្សត្រម៉ាឡេស៉ី ព្រះចៅស៊ូលតង់ Ibrahim Sultan Iskandar បានមានបន្ទូលទៅកាន់ប្រធានាធិបតីរុស្ស៉ី លោក វ៉្លាឌីមៀ ពូទីន ថាម៉ាឡេស៉ីចាត់ទុករុស្ស៉ី ជាដៃគូសំខាន់មួយនិងអាចពឹងពាក់បាន ហើយមានឆន្ទៈកសាងទំនាក់ទំនងរវាងគ្នា ឱ្យកាន់តែជិតស្និទ្ធថែមទៀត។ នេះបើតាមការចេញផ្សាយដោយ សារព័ត៌មាន CNA នាថ្ងៃព្រហស្បតិ៍ ទី៧ ខែសីហា ឆ្នាំ២០២៥។

ក្នុងសារបង្ហោះលើទំព័រ Facebook របស់ទ្រង់កាលពីថ្ងៃពុធសប្តាហ៍នេះ ព្រះចៅស៊ូលតង់ Ibrahim បានមានព្រះរាជបន្ទូលយ៉ាងដូច្នេះថា «ខ្ញុំសូមប្រកាសថា ដំណើរទស្សនកិច្ចផ្លូវរដ្ឋនេះមកកាន់សហព័ន្ធរុស្ស៉ី គឺពង្រឹងបន្ថែមទៀតនូវទំនាក់ទំនង និងកិច្ចសហប្រតិបត្តិការរវាង​ប្រទេសទាំងពីរ។ ម៉ាឡេស៉ីចាត់ទុករុស្ស៉ីជា ដៃគូសំខាន់និងអាចជឿជាក់បាន។ ដូចសុភាសិតរុស្ស៉ីមួយពោលថា មិត្តភាពមានតម្លៃជាង​មាសប្រាក់ទៅទៀត។ ក្នុងស្មារតីនៃមិត្តភាពនេះហើយ ទើបខ្ញុំជឿថាយើងនឹងបន្តតម្រង់ទិសដៅ នៃទំនាក់ទំនងរវាងប្រទេសយើងទាំងពីរ ដើម្បីជាប្រយោជន៍សម្រាប់ប្រជាជនយើងទាំងអស់»។

ដោយឡែក ក្នុងសុន្ទរកថាទទួលស្វាគមន៍ព្រះមហាក្សត្រម៉ាឡេស៉ី លោក ពូទីន បាននិយាយថា រុស្ស៉ីនិងម៉ាឡេស៉ីបានរួមគ្នាកសាង​កិច្ចសន្ទនានយោបាយយ៉ាងរឹងមាំ រក្សាប្រាស្រ័យទាក់ទងជិតស្និទ្ធរវាងរដ្ឋាភិបាល និងអភិវឌ្ឍចំណងទាក់ទងជាប់រវាងសមាជិកសភា អំឡុងរយៈពេលប្រមាណ៦ទសវត្សរ៍មកនេះ។ លោក ពូទីន បានបន្ថែមថា រុស្ស៉ីក៏ពេញចិត្តនឹងគាំទ្របំណងរបស់ម៉ាឡេស៉ី ដែលចង់​ចូលរួមជារដ្ឋដៃគូនៃក្រុមប្រទេស BRICS ផងដែរ ហើយលោកចាត់ទុកថា វានឹងជាការបោះជំហានដ៏ប្រសើរមួយ ដែលនឹងផ្តល់អត្ថប្រយោជន៍ដល់ទំនាក់ទំនងទ្វេភាគី។

គួរបញ្ជាក់ថា ព្រះរាជទស្សនកិច្ចខាងលើរបស់ព្រះចៅស៊ូលតង់ Ibrahim ចាប់ពីថ្ងៃទី៥ ដល់ថ្ងៃទី១០ ខែសីហា តបតាមការអញ្ជើញរបស់លោក ពូទីន ផ្ទាល់ គឺជាដំណើរទស្សនកិច្ចលើកដំបូងបង្អស់ ធ្វើឡើងដោយព្រះមហាក្សត្រម៉ាឡេស៉ី ទៅកាន់ប្រទេសរុស្ស៉ី គិតចាប់តាំងតែពីប្រទេសទាំងពីរ បានផ្សារភ្ជាប់ចំណងការទូតកាលពីឆ្នាំ១៩៦៧។ កាលពីខែឧសភាកន្លងទៅ នាយករដ្ឋមន្រ្តីម៉ាឡេស៉ី លោក Anwar Ibrahim ក៏បានបំពេញទស្សនកិច្ចទៅកាន់រុស្ស៉ី ហើយជួបលោក ពូទីន ផងដែរ៕