(ម៉ាឌ្រីដ)៖ អ្នកនាំពាក្យក្រសួងការពារជាតិអេស៉្បាញ កាលពីថ្ងៃពុធ ទី៦ ខែសីហា បាននិយាយថា អេស៉្បាញបានសម្រេចចិត្តលែងពិចារណាលើ ជម្រើសទិញយន្តហោះចម្បាំងផលិតដោយសហរដ្ឋអាមេរិក F-35 ទៀតហើយ ដោយឥឡូវនេះ កំពុងជ្រើសរើស​រវាងយន្តហោះចម្បាំង Eurofighter និង Future Combat Air System (FCAS) ដែលផលិតដោយអឺរ៉ុបផ្ទាល់វិញ។ នេះបើតាមការចេញផ្សាយដោយ ទីភ្នាក់ងារព័ត៌មាន Reuters។

យន្តហោះចម្បាំង F-35 គឺជាផលិតផលរបស់ក្រុមហ៊ុនអាមេរិក Lockheed Martin។ ដោយឡែក យន្តហោះចម្បាំង Eurofighter គឺផលិតដោយក្រុមហ៊ុន Airbus, BAE Systems និង Leonardo ខណៈយន្តហោះចម្បាំងនៃគម្រោង FCAS កំពុងស្ថិតក្នុងដំណើរការអភិវឌ្ឍដោយក្រុមហ៊ុន Dassault Aviation, Airbus និង Indra Sistemas។

គួរបញ្ជាក់ថា បើតាមសេចក្តីរាយការណ៍កាលពីថ្ងៃពុធ របស់ប្រព័ន្ធផ្សព្វផ្សាយអេស៉្បាញ El Pais ​រដ្ឋាភិបាលអេស៉្បាញ បានកំណត់ថវិកាចំនួន ៦.២៥ពាន់លានអឺរ៉ូ (៧.២៤ពាន់លានដុល្លារអាមេរិក) ក្នុងកញ្ចប់ថវិកាឆ្នាំ២០២៣របស់ខ្លួន ដើម្បីទិញយន្តហោះចម្បាំងថ្មីៗ ប៉ុន្តែផែនការរបស់រដ្ឋាភិបាលអេស៉្បាញ ក្នុងការចំណាយភាគច្រើននៃថវិកាបន្ថែមចំនួន ១០.៥ពាន់លានដុល្លារ សម្រាប់វិស័យការពារជាតិឆ្នាំនេះនៅអឺរ៉ុបផ្ទាល់ ធ្វើឱ្យជម្រើសទិញយន្តហោះចម្បាំង F-35 គឺមិនអាចទៅរួច៕