(សេអ៊ូល)៖ ក្រុមរដ្ឋអាជ្ញាបានិយាយថា រដ្ឋអាជ្ញារពិសេសកូរ៉េខាងត្បូង កំពុងធ្វើការស៉ើបអង្កេតទៅលើអតីតស្រ្តីទី១ លោកស្រី Kim Keon Hee ជុំវិញការចោទប្រកាន់ពីបទពុករលួយ ដោយនៅថ្ងៃព្រហស្បតិ៍នេះ បានដាក់សំណើទៅតុលាការ ដើម្បីចេញដីកាឃុំខ្លួន។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃព្រហស្បតិ៍ ទី៧ ខែសីហា ឆ្នាំ ២០២៥។

លោកស្រី Kim និងស្វាមីលោក Yoon Suk Yeol ដែលជាអតីតប្រធានាធិបតី កំពុងត្រូវបានស៉ើបអង្កេតដោយរដ្ឋអាជ្ញាពិសេសពីររូប ដាច់ដោយឡែក បន្ទាប់ពីអតីតប្រធានាធិបតីកូរ៉េខាងត្បូងរូបនេះ ត្រូវបណ្តេញចេញពីតំណែងកាលពីខែមេសា ជុំវិញផែនការប្រកាសច្បាប់អាជ្ញាសឹក។

លោកស្រី Kim បានបង្ហាញខ្លួនក្នុងការសាកសួរ នៅឯការិយាល័យរបស់រដ្ឋអាជ្ញាពិសេស កាលពីថ្ងៃពុធ ចំពោះការចោទប្រកាន់ ដែលរួមមានការក្លែងបន្លំភាគហ៊ុន និងទទួលសំណូក។ លោកស្រី បាន​សុំ​ទោស​ចំពោះ​ការ​បង្កឱ្យ​មាន​ក្តីបារម្ភ ប៉ុន្តែ​មិន​បាន​ឆ្លើយ​សំណួរ​អ្នក​កាសែត​ អំពី​ការ​ចោទ​ប្រកាន់​មក​លើ​លោកស្រី​ឡើយ។

រដ្ឋអាជ្ញាពិសេស មិនបានផ្តល់ព័ត៌មានលម្អិតបន្ថែម អំពីសំណើសុំដីកាចាប់ខ្លួន លោកស្រី Kim នោះទេ ខណៈមេធាវីរបស់លោកស្រី បានបដិសេធការចោទប្រកាន់ប្រឆាំងនឹងលោកស្រី៕