(ហ្សាការតា)៖ អ្នកនាំពាក្យការិយាល័យប្រធានាធិបតី បានឱ្យដឹងថា ឥណ្ឌូណេស៉ី នឹងប្រែក្លាយកន្លែងព្យាបាលមួយ នៅលើកោះ Galang ដែលគ្មានមនុស្សរស់នៅ ដើម្បីព្យាបាលអ្នករបួសនៅតំបន់ហ្កាហ្សា ប្រហែល ២ ០០០នាក់ ដែលនឹងត្រលប់ទៅផ្ទះវិញ បន្ទាប់ពីជាសះស្បើយ។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃព្រហស្បតិ៍ ទី៧ ខែសីហា ឆ្នាំ ២០២៥។

លោក Hasan Nasbi បានប្រាប់អ្នកយកព័ត៌មានថា ឥណ្ឌូណេស៉ី នឹងផ្តល់ការព្យាបាលដល់អ្នកស្រុក ដែលបានក្លាយជនរងគ្រោះនៃសង្រ្គាម អ្នកត្រូវរបួស ហើយវាមិនមែនជាការជម្លៀសមនុស្សទេ។ លោកបន្ថែមថា ឥណ្ឌូណេស៉ី គ្រោងយកកោះ Galang ស្ថិតនៅចុងបំផុតនៃប្រជុំកោះ Sumatra ភាគខាងត្បូងសិង្ហបុរី ជាកន្លែងព្យាបាលបណ្តោះអាសន្ន ហើយផ្តល់កន្លែងស្នាក់នៅសម្រាប់គ្រួសារពួកគេ។ អ្នកជំងឺនឹងត្រឡប់ទៅវិញបន្ទាប់ពីជាសះស្បើយ។

គួរបញ្ជាក់ថា ឥណ្ឌូណេស៉ី ដែលជាប្រទេសមានអ្នកកាន់សាសនាឥស្លាមដ៏ធំមួយ បានផ្តល់ជំនួយមនុស្សធម៌ទៅកាន់តំបន់ហ្កាហ្សា ក្រោយអ៉ីស្រាអែលផ្តើមការវាយប្រហារ ក្នុងខែតុលា ឆ្នាំ ២០២៣ ដែលបើតាមមន្រ្តីសុខាភិបាលនៅទីនោះថា បានសម្លាប់ជនជាតិប៉ាឡេស្ទីនជាង ៦០ ០០០នាក់៕