(មូស្គូ)៖ នៅថ្ងៃព្រហស្បតិ៍ ទី៧ ខែសីហា វិមានក្រឹមឡាំង បានទទួលស្គាល់ថា ​ប្រធានាធិបតីរុស្ស៉ី លោក វ៉្លាឌីមៀ ពូទីន និងប្រធានាធិបតីអាមេរិក លោក ដូណាល់ ត្រាំ នឹងជួបគ្នាដើម្បីបើកកិច្ចប្រជុំកំពូលនៅប៉ុន្មានថ្ងៃខាងមុខ។ នេះបើតាមការចេញផ្សាយដោយ ទីភ្នាក់ងារព័ត៌មាន AFP។

មន្រ្តីវិមានក្រឹមឡាំង លោក Yuri Ushakov បាននិយាយថា «តបតាមយោបល់របស់ភាគីអាមេរិក ការព្រមព្រៀងគ្នាមួយ ត្រូវសម្រេចបានជាគោលការណ៍ ដើម្បីរៀបចំកិច្ចប្រជុំកំពូល (រវាងលោក ពូទីន និងលោក ត្រាំ) នៅប៉ុន្មានថ្ងៃខាងមុខនេះ។ ឥឡូវ ពួកយើងកំពុងចាប់ផ្តើមកំណត់សេចក្តីលម្អិតរួមគ្នា ជាមួយខាងភាគីអាមេរិក។ សប្តាហ៍ក្រោយនេះ ត្រូវបានកំណត់ជាកាលបរិច្ឆេទគោលដៅ»។ លោក Ushakov បានបន្ថែមថា ទីតាំងនៃកិច្ចប្រជុំត្រូវបានឯកភាពគ្នាហើយជាគោលការណ៍ ប៉ុន្តែលោកមិនបានបង្ហើបថា នឹងប្រព្រឹត្តទៅនៅទីណាឱ្យប្រាកដឡើយ។

សេចក្តីប្រកាសខាងលើធ្វើឡើងមួយថ្ងៃ បន្ទាប់ពីលោក ដូណាល់ ត្រាំ បានប្រកាសថា នឹងជួបលោក ពូទីន ដោយផ្ទាល់ ក្នុងពេលឆាប់ៗ និងបន្ទាប់ពីបេសកជនពិសេសរបស់លោក គឺលោក Steve Witkoff បានជួបពិភាក្សាជាមួយ​លោកប្រធានាធិបតីរុស្ស៉ី នៅទីក្រុងមូស្គូ។ អំឡុងជំនួបនោះ លោក Witkoff ក៏បានស្នើឱ្យមានកិច្ចប្រជុំត្រីភាគី ជាមួយប្រធានាធិបតីអ៊ុយក្រែន លោក វ៉ូឡូឌីមៀ ហ្សេលេនស្គី ផងដែរ ប៉ុន្តែបើតាមលោក Ushakov រុស្ស៉ីសម្រេចមិនឆ្លើយតបចំពោះសំណើនេះទេ។

គួរបញ្ជាក់ថា កិច្ចប្រជុំកំពូល ត្រាំ-ពូទីន នឹងជាជំនួបលើកដំបូងបង្អស់រវាងប្រធានាធិបតីអាមេរិក និងប្រធានាធិបតីរុស្ស៉ី គិតចាប់តាំងពីលោក ចូ បៃដិន បានជួបលោក ពូទីន នៅទីក្រុងហ្សឺណែវកាលពីខែមិថុនា ឆ្នាំ២០២១ ហើយចំពេលដែលលោក ត្រាំ កំពុងបន្តព្យាយាមសម្រុះសម្រួលស្វែងរកទីបញ្ចប់ សម្រាប់សង្រ្គាមឈ្លានពានរបស់រុស្ស៉ីនៅអ៊ុយក្រែន៕