(វ៉ាស៊ីនតោន)៖ ប្រធានាធិបតីអាមេរិក លោក ដូណាល់ ត្រាំ បានមានប្រសាសន៍នៅថ្ងៃព្រហស្បតិ៍ថា វាជារឿងសំខាន់ណាស់ដែលបណ្តាប្រទេសនៅមជ្ឈិមបូព៌ាចូលរួមក្នុងកិច្ចព្រមព្រៀង Abraham Accords ដែលមានគោលបំណងធ្វើប្រក្រតីនីយកម្មទំនាក់ទំនងការទូតជាមួយអ៊ីស្រាអែល ដោយលោកបានបញ្ជាក់ថា វានឹងធានាសន្តិភាពនៅក្នុងតំបន់។ នេះបើយោងតាមការចេញផ្សាយដោយ ទីភ្នាក់ងារសារព័ត៌មាន Reuters នៅថ្ងៃទី៧ ខែសីហា ឆ្នាំ២០២៥។

នៅក្នុងការបង្ហោះតាមបណ្ដាញសង្គម លោក ត្រាំ បានសរសេរថា «ឥឡូវនេះ ឃ្លាំងអាវុធនុយក្លេអ៊ែរដែលអ៊ីរ៉ង់កំពុង "បង្កើត" ត្រូវបានបំផ្លាញទាំងស្រុង។ វាពិតជាសំខាន់ណាស់សម្រាប់ខ្ញុំ ដែលប្រទេសមជ្ឈិមបូព៌ាទាំងអស់ចូលរួមក្នុងកិច្ចព្រមព្រៀង Abraham Accords»។

គួរបញ្ជាក់ថា កិច្ចព្រមព្រៀង Abraham Accords ដែលត្រូវបានចុះហត្ថលេខាក្នុងអំឡុងអាណត្តិដំបូងរបស់លោក ត្រាំ បានធ្វើឲ្យប្រទេសអារ៉ាប់ចំនួនបួន យល់ព្រមធ្វើប្រក្រតីនីយកម្មទំនាក់ទំនងការទូតជាមួយអ៊ីស្រាអែល បន្ទាប់ពីការសម្របសម្រួលរបស់សហរដ្ឋអាមេរិក។ ទោះបីជាយ៉ាងណា ការព្យាយាមពង្រីកកិច្ចព្រមព្រៀងនេះជួបភាពស្មុគស្មាញ ដោយសារចំនួនអ្នកស្លាប់ខ្ពស់ និងវិបត្តិអត់ឃ្លាននៅហ្គាហ្សា។

ប្រភពចំនួនប្រាំដែលដឹងពីបញ្ហានេះបានឱ្យដឹងថា រដ្ឋបាលលោក ត្រាំ កំពុងពិភាក្សាយ៉ាងសកម្មជាមួយអាស៊ែបៃហ្សង់ ដើម្បីនាំប្រទេសនេះ និងសម្ព័ន្ធមិត្តអាស៊ីកណ្តាលមួយចំនួន ឱ្យចូលរួមក្នុងកិច្ចព្រមព្រៀង Abraham៕