(ហូនីអារ៉ា)៖ នាយករដ្ឋមន្ត្រីកោះសូឡូម៉ុន លោក Jeremiah Manele បានប្រកាសថា ប្រទេសម្ចាស់ជំនួយចំនួន ២១ រួមទាំងសហរដ្ឋអាមេរិក ចិន និងតៃវ៉ាន់ នឹងមិនត្រូវបានអញ្ជើញឱ្យចូលរួមកិច្ចប្រជុំកំពូលនយោបាយប៉ាស៊ីហ្វិកនោះទេ។ ការសម្រេចចិត្តនេះ ធ្វើឡើងបន្ទាប់ពីមានសម្ពាធពីទីក្រុងប៉េកាំងឱ្យរារាំងតៃវ៉ាន់។ នេះបើយោងតាមការចេញផ្សាយដោយ ទីភ្នាក់ងារសារព័ត៌មាន Reuters។

កោះសូឡូម៉ុន ដែលសម្ព័ន្ធមិត្តសន្តិសុខដ៏សំខាន់របស់ចិននៅតំបន់ប៉ាស៊ីហ្វិក នឹងធ្វើជាម្ចាស់ផ្ទះកិច្ចប្រជុំប្រចាំឆ្នាំរបស់វេទិកាដែលមានសមាជិក ១៨ ប្រទេសនៅខែកញ្ញាខាងមុខនេះ។ លោក Manele បានថ្លែងនៅក្នុងសភាកាលពីថ្ងៃពុធថា គណៈរដ្ឋមន្ត្រីបានសម្រេចមិនអញ្ជើញដៃគូសន្ទនាណាមួយឱ្យចូលរួមក្នុងព្រឹត្តិការណ៍ឆ្នាំនេះទេ ដោយលើកហេតុផលថា ការពិនិត្យឡើងវិញនៃទំនាក់ទំនងរបស់ប្រទេសនីមួយៗជាមួយតំបន់ប៉ាស៊ីហ្វិកមិនទាន់បញ្ចប់នៅឡើយ។

អ្នកនយោបាយក្នុងសម្ព័ន្ធ លោក Peter Kenilorea Jr បានរិះគន់ការសម្រេចចិត្តនេះថាជា «ការបាត់បង់ឱកាសដ៏ធំធេង» សម្រាប់ប្រទេសកោះប៉ាស៊ីហ្វិកក្នុងការជួបជាមួយម្ចាស់ជំនួយសកល។ លោកបានថ្លែងនៅក្នុងសភាថា «យើងដឹងថាបញ្ហានេះកើតចេញពីជម្លោះរវាងចិន និងតៃវ៉ាន់»។

ប្រធានាធិបតីកោះម៉ាស្សល លោកស្រី Hilda Heine ដែលមានសម្ព័ន្ធមិត្តជាមួយកោះតៃវ៉ាន់ បានរិះគន់ចិនក្នុងការជ្រៀតជ្រែកក្នុងកិច្ចការវេទិកានេះ ដោយចោទប្រកាន់ថា បាន «ជ្រៀតជ្រែក» ក្នុងកិច្ចប្រជុំឆ្នាំមុន ដើម្បីផ្លាស់ប្តូរខ្លឹមសារនៃសេចក្តីថ្លែងការណ៍រួមរបស់មេដឹកនាំ។

គួរបញ្ជាក់ថា តំបន់កោះប៉ាស៊ីហ្វិកជាតំបន់ដែលពឹងផ្អែកលើជំនួយច្រើនជាងគេបំផុតលើពិភពលោក និងកំពុងប្រឈមនឹងបញ្ហាកម្ពស់ទឹកសមុទ្រកើនឡើង។ តំបន់នេះក៏ជាចំណុចកណ្តាលនៃជម្លោះសន្តិសុខរវាងសហរដ្ឋអាមេរិក និងចិនផងដែរ៕