(វ៉ាស៊ីនតោន)៖ ក្រុមហ៊ុនបញ្ចុះបញ្ចូលមួយ (lobby) នៅក្នុងទីក្រុងវ៉ាស៊ីនតោន បានចុះហត្ថលេខាលើកិច្ចព្រមព្រៀងមួយមានទំហំទឹកប្រាក់ ៣លានដុល្លារ ជាមួយក្រសួងព័ត៌មាន របស់មីយ៉ាន់ម៉ា ដើម្បីជួយប្រទេសគ្រប់គ្រងដោយយោធាមួយនេះជួសជុលទំនាក់ទំនងឡើងវិញជាមួយសហរដ្ឋអាមេរិក។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters។

ក្រុមហ៊ុនបញ្ចុះបញ្ចូលមានឈ្មោះថា DCI Group បានចុះហត្ថលេខាលើកិច្ចព្រមព្រៀងជាមួយក្រសួងព័ត៌មានរបស់មីយ៉ាន់ម៉ាកាលពីថ្ងៃទី៣១ ខែកក្កដា ជាថ្ងៃតែមួយដែលរបបសឹក បានផ្ទេរអំណាចទៅឱ្យរដ្ឋាភិបាលស៊ីវិលមួយដែលខ្លួនបានបង្កើតឡើង ដើម្បីដឹកនាំគម្រោងរៀបចំការបោះឆ្នោតសកលនៅក្នុងឆ្នាំ២០២៥នេះ។ កាលពីឆ្នាំ២០២១ ពោលជាឆ្នាំដែល រដ្ឋប្រហារផ្ទុះឡើង របបសឹកមីយ៉ាន់ម៉ាក៏ធ្លាប់បានជួលអ្នកបញ្ចុះបញ្ចូលម្នាក់ឱ្យធ្វើជាតំណាងរបស់ពួកគេនៅក្នុងទីក្រុងវ៉ាស៊ីនតោនផងដែរ។ ប៉ុន្តែនៅពេលនោះអ្នកបញ្ចុះបញ្ចូលរូបនេះ បាននិយាយថាលោកបានបញ្ឈប់កិច្ចការបញ្ចុះបញ្ចូលរបស់លោក ដោយសារតែទណ្ឌកម្មរបស់សហរដ្ឋអាមេរិកលើក្រុមឧត្តមសេនីយ៍មីយ៉ាន់ម៉ា មិនអាចឱ្យលោកទទួលបានប្រាក់ថ្លៃ ជួលរូបលោក។

ក្រសួងហិរញ្ញវត្ថុអាមេរិក ក្រុមហ៊ុន DCI Group និងក្រសួងការបរទេសអាមេរិក រួមទាំងស្ថានទូតមីយ៉ាន់ម៉ាប្រចាំទីក្រុងវ៉ាស៊ីនតោន មិនបានធ្វើអត្ថាធិប្បាយអ្វីឆ្លើយតបទៅនឹង ការស្នើសុំបកស្រាយថាតើទណ្ឌកម្មរបស់សហរដ្ឋអាមេរិកអាចនឹងប៉ះពាល់ដល់កិច្ចព្រមព្រៀងរវាងក្រសួងព័ត៌មានមីយ៉ាន់ម៉ា និងក្រុមហ៊ុន DCI Group ឬក៏យ៉ាងណានោះទេ៕