(តូក្យូ)៖ ទីភ្នាក់ងារឧតុនិយមជប៉ុន បានជូនដំណឹងអំពីភ្លៀងធ្លាក់ក្នុងតំបន់ Kagoshima ភាគខាងត្បូងប្រទេស នាថ្ងៃសុក្រ ទី៨ ខែសីហា ជាមួយការព្រមានអំពីហានិភ័យនៃគ្រោះថ្នាក់ដល់អាយុជីវិត។ នេះបើយោងតាមការចេញផ្សាយដោយទីភ្នាក់ងារសារព័ត៌មាន AFP។

មន្រ្តីទីភ្នាក់ងារឧតុនិយមម្នាក់ បានប្រាប់សន្និសីទសារព័ត៌មានថា «តំបន់ Kagoshima កំពុងប្រឈមមុខនឹងភ្លៀងធ្លាក់ មិនធ្លាប់ជួបប្រទះពីមុនមក។ មានហានិភ័យនៃគ្រោះថ្នាក់ដល់ជីវិត យើងសូមស្នើឱ្យពលរដ្ឋការពារខ្លួនឯង ដោយការផ្លាស់ទៅកន្លែងដែលនៅឆ្ងាយពីអូរ ឬច្រាំងថ្មចោទ ឬទៅអគារខ្ពស់ដែលមិនសូវងាយរងគ្រោះដោយទឹកជំនន់»។

មន្ត្រីដដែលរូបនេះ បាន​ជំរុញ​អ្នក​ស្រុក​ឱ្យ​ជម្លៀស​ចេញ​ ដោយ​មិន​បាច់រង់ចាំ​សេចក្តីណែនាំ​ពី​សាលាក្រុង។ តាម Kyodo News មានភ្លៀងកម្រិតជាង ៤៩០មីលីម៉ែត្រក្នុងរយៈពេល ២៤ម៉ោងនៅទីក្រុង Kirishima តំបន់ Kagoshima គិតត្រឹមព្រលឹមថ្ងៃសុក្រ ដែលជាភ្លៀងធ្លាក់ខ្លាំងបំផុតមិនធ្លាប់មាន នាំឱ្យជើងហោះហើរក្នុងស្រុកត្រូវបានលុបចោល។

គួរបញ្ជាក់ថា ភ្លៀងធ្លាក់ខ្លាំងនេះបានកើតឡើង បន្ទាប់ពីអាកាសធាតុនៅផ្នែកខ្លះនៃប្រទេសជប៉ុន មានលក្ខណៈក្តៅខ្លាំង ជាមួយនិងសីតុណ្ហភាពរហូតដល់ ៤១.៨អង្សាសេ៕