(ហ៊្សេរុយសាឡិម)៖ ការិយាល័យនាយករដ្ឋមន្រ្តីអ៉ីស្រាអែល នៅថ្ងៃសុក្រ ទី៨ ខែសីហា បានចេញសេចក្តីថ្លែងការណ៍មួយថា គណៈរដ្ឋមន្រ្តីអ៉ីស្រាអែល បានអនុម័តជាផ្លូវកា រនូវផែនការរបស់នាយករដ្ឋមន្រ្តី លោក Benjamin Netanyahu ដើម្បីឱ្យយោធាអ៉ីស្រាអែល ចូលគ្រប់គ្រងទីក្រុង Gaza City។ នេះបើតាមការចេញផ្សាយដោយ ទីភ្នាក់ងារព័ត៌មាន AFP។

សេចក្តីថ្លែងការណ៍ខាងលើ មានខ្លឹមសារយ៉ាងដូច្នេះថា «ក្រោមផែនការដើម្បីកម្ចាត់ក្រុមហាម៉ាស នៅតំបន់ Gaza Strip កងទ័ពអ៉ីស្រាអែល នឹងត្រៀមលក្ខណៈដើម្បីចូលគ្រប់គ្រងទីក្រុង Gaza City ហើយទន្ទឹមគ្នាចែកចាយជំនួយមនុស្សធម៌ ដល់​ប្រជាជនស៉ីវិលដែលស្ថិតនៅក្រៅតំបន់ប្រយុទ្ធគ្នា»។ Gaza City ដែលស្ថិតនៅភាគខាងជើងតំបន់ Gaza Strip គឺជាទីក្រុងធំជាងគេរបស់ដែនដីប៉ាឡេស្ទីនមួយនេះ។

សេចក្តីថ្លែងការណ៍បានបន្តថា «គណៈរដ្ឋមន្រ្តីបានអនុម័តគោលការណ៍សំខាន់ៗចំនួន៥ ដើម្បីឆ្ពោះទៅរកការបិទបញ្ចប់សង្រ្គាម រួមមាន រំសាយអាវុធរបស់ហាម៉ាស នាំយកចំណាប់ខ្មាំងនៅសេសសល់មកវិញទាំងនៅមានជីវិតនិងស្លាប់ លុបបំបាត់កម្លាំងយោធានៅ Gaza Strip ក្តោបក្តាប់ការគ្រប់គ្រងផ្នែកសន្តិសុខលើតំបន់ Gaza Strip និងបង្កើតរដ្ឋបាលស៉ីវិលថ្មីផ្សេងមួយដើម្បីដឹកនាំតំបន់នេះ ដែលមិនមែនហាម៉ាស ឬអាជ្ញាធរប៉ាឡេស្ទីន (Palestinian Authority)»។

គួរបញ្ជាក់ថា កាលពីថ្ងៃព្រហស្បតិ៍ លោក Netanyahu បាននិយាយថា អ៉ីស្រាអែលមានបំណងចង់គ្រប់គ្រងផ្នែកយោធាលើតំបន់ Gaza Strip ទាំងមូល ប៉ុន្តែមិនដឹកនាំតំបន់នេះទេ បើទោះបីជាមានការបន្តរិះគន់ខ្លាំងឡើងទាំងនៅក្នុងប្រទេស និងពីសំណាក់សហគមន៍អន្តរជាតិក៏ដោយ ជុំវិញសង្រ្គាមដ៏ប្រល័យនិងដ៏បំផ្លិចបំផ្លាញ ដែលអូសបន្លាយជិត២ឆ្នាំមកហើយ៕