(កង់បេរ៉ា)៖ រដ្ឋ New South Wales នៃប្រទេសអូស្រ្តាលី បានស្នើផ្តល់សំណងជាទឹកប្រាក់ចំនួន២លានដុល្លារអូស្រ្តាលី (១.៣១លានដុល្លារអាមេរិក) ឱ្យទៅស្រ្តីម្នាក់ដែលបានជាប់ពន្ធនាគារអស់រយៈ២ទសវត្សរ៍ទាំងគ្មានកំហុស ជុំវិញការសម្លាប់នៃកូនវ័យក្មេងៗសរុបចំនួន៤នាក់ របស់ស្រ្តីម្នាក់នោះ។ នេះបើតាមការចេញផ្សាយដោយ ទីភ្នាក់ងារព័ត៌មាន Reuters។

ស្រ្តីឈ្មោះ Kathleen Folbigg សព្វថ្ងៃអាយុ៥៨ឆ្នាំ ត្រូវបានតុលាការរកឃើញជាប់ពិរុទ្ធកាលពីឆ្នាំ២០០៣ ពីបទសម្លាប់កូនចំនួន៤នាក់​របស់ខ្លួន។ ក្រោយមក លោកស្រី Folbigg ក៏ត្រូវបានលើកលែងទោស ដោះលែង និងលុបចោលការជាប់ពិរុទ្ធវិញ កាលពីឆ្នាំ២០២៣ បន្ទាប់ពីការស៉ើបអង្កេតឯករាជ្យមួយ បានរកឃើញភស្តុតាងវិទ្យាសាស្រ្តថ្មីៗ ដែលបង្ហាញថា កូនៗទាំងនោះ ទំនងជាអាចបានស្លាប់ ដោយសារតែកត្តាធម្មជាតិ ឬក៏បញ្ហាហ្សែនខុសប្រក្រតី។

កូនទាំង៤នាក់របស់លោកស្រី Folbigg ដែលមានអាយុត្រឹមចន្លោះ១៩ថ្ងៃ និង១៨ខែ បានបាត់បង់ជីវិត ក្នុងអំឡុងពេល១០ឆ្នាំ គិតចាប់តាំងពី១៩៨៩ ដល់ឆ្នាំ១៩៩៩។ នៅឆ្នាំ២០០៣ លោកស្រីត្រូវបានតុលាការផ្តន្ទាទោស ក្រោមការចោទប្រកាន់ថា លោកស្រីបានសម្លាប់កូនរបស់ខ្លួនដោយខ្ទប់ដង្ហើមពួកគេ បើទោះបីជាពេលនោះខ្វះភស្តុតាងជាក់ស្តែងក៏ដោយ។ ពីដំបូង លោកស្រី ត្រូវបានកាត់ឱ្យជាប់ពន្ធនាគាររហូតដល់៤០ឆ្នាំ ប៉ុន្តែក្រោយមកបន្ថយមកនៅ៣០ឆ្នាំ ក្នុងនោះត្រូវជាប់រយៈពេល២៥ឆ្នាំ ដោយគ្មានសិទ្ធិស្នើសុំដោះលែងមុនពេលកំណត់។

គួរបញ្ជាក់ថា ការផ្តល់សំណងពីរដ្ឋ New South Wales គឺជាអំណោយដោយស្ម័គ្រចិត្ត ដែលមិនមែនជាកាតព្វកិច្ចផ្លូវច្បាប់ទេ។ ទោះជាបែបនេះក្តី មេធាវីរបស់លោកស្រី Folbigg បានលើកឡើងថា ប្រាក់សំណងនោះគឺអយុត្តិធម៌ជាខ្លាំង ដ្បិតវាមិនឆ្លុះបញ្ចាំង​ពីការឈឺចាប់និងទុក្ខវេទនា ដែលលោកស្រី Folbigg បានឆ្លងកាត់ឡើយ ពោលគឺលោកស្រី មិនត្រឹមបាត់បង់កូន៤នាក់ប៉ុណ្ណោះទេ ប៉ុន្តែក៏បានបាត់បង់ពេលវេលា២០ឆ្នាំដ៏មានតម្លៃផងដែរ៕