(ម៉ានីល)៖ នៅថ្ងៃសុក្រ ទី៨ ខែសីហា ចិនបានចោទប្រកាន់ហ្វីលីពីនថា កំពុងប្រឡែងលេងជាមួយភ្លើង បន្ទាប់ពីប្រធានាធិបតីហ្វីលីពីន លោក Ferdinand Marcos Jr បាននិយាយថា ហ្វីលីពីននឹងត្រូវអូសទាញឱ្យចូលពាក់ព័ន្ធ ក្នុងជម្លោះណាមួយដែលផ្ទុះឡើងរវាង​ចិននិងសហរដ្ឋអាមេរិក ជុំវិញបញ្ហាកោះតៃវ៉ាន់។ នេះបើតាមការចេញផ្សាយដោយ ទីភ្នាក់ងារព័ត៌មាន Reuters។

កាលពីថ្ងៃពុធសប្តាហ៍នេះ អំឡុងទស្សនកិច្ចនៅប្រទេសឥណ្ឌា លោក Marcos បាននិយាយថា ដោយសារតែហ្វីលីពីនមានទីតាំងភូមិសាស្រ្តស្ថិតនៅកៀកកោះតៃវ៉ាន់ ហើយនៅទីនោះ ក៏មានសហគមន៍ហ្វីលីពីនធំថែមទៀត ការចូលពាក់ព័ន្ធគឺនឹងចាំបាច់ ប្រសិនបើមានសង្រ្គាមផ្ទុះឡើង។

ឆ្លើយតបការអត្ថាធិប្បាយរបស់លោកប្រធានាធិបតីហ្វីលីពីន ក្រសួងការបរទេសចិន បានចេញសេចក្តីថ្លែងការណ៍ថា ភាពជិតនៃទីតាំងភូមិសាស្រ្ត និងចំនួនប្រជាជនច្រើននៅក្រៅប្រទេស គឺមិនមែនជាលេសសម្រាប់ឱ្យប្រទេសមួយ ចូលលូកលាន់កិច្ចការផ្ទៃក្នុងរបស់ប្រទេសដទៃឡើយ។

ទីក្រុងប៉េកាំងបានបន្តថា ចិនទទូចឱ្យហ្វីលីពីនគោរពគោលការណ៍ចិនតែមួយ ហើយកុំប្រឡែងលេងជាមួយភ្លើង ជុំវិញបញ្ហាពាក់ព័ន្ធផលប្រយោជន៍ស្នូលរបស់ចិន។ បើតាមទីក្រុងប៉េកាំង ការលើកឡើងរបស់លោក Marcos មិនត្រឹមបំពានច្បាប់អន្តរជាតិនិងធម្មនុញ្ញអាស៊ានប៉ុណ្ណោះទេ ប៉ុន្តែក៏ប៉ះពាល់សុខសន្តិភាពនិងស្ថិរភាពនៅក្នុងតំបន់ ព្រមទាំងផលប្រយោជន៍មូលដ្ឋាន របស់ប្រជាជនហ្វីលីពីនផ្ទាល់ផងដែរ។

គួរបញ្ជាក់ថា ចាប់តាំងពីលោក Marcos ក្លាយជាមេដឹកនាំហ្វីលីពីន ភាពតានតឹងបានកើនឡើងខ្លាំងជាមួយចិន ជុំវិញជម្លោះដែនទឹក នៅសមុទ្រចិនខាងត្បូង។ ប្រទេសទាំងពីរ បានចោទប្រកាន់គ្នាទៅវិញទៅមក អំពីការធ្វើសកម្មភាពបង្កហេតុ និងរំលោភបំពានអធិបតេយ្យនៅទីនោះ ជាហេតុនាំឱ្យសហរដ្ឋអាមេរិក ចេញមុខបញ្ជាក់អំពីការប្តេជ្ញារបស់ខ្លួន ដើម្បីការពារហ្វីលីពីន៕