(ញូវដែលី)៖ អ្នកជំនាញនិយាយថា ទឹកជំនន់យ៉ាងខ្លាំងក្លាលាយឡំនឹងដីភក់ ដែលបានហូរកាត់ទីប្រជុំជននៃជួរភ្នំហិម៉ាល័យ ប្រទេសឥណ្ឌា ក្នុងសប្តាហ៍នេះ ទំនងជាបណ្តាលមកពីផ្ទាំងទឹកកករលាយ ដោយសារឥទ្ធិពលនៃការប្រែប្រួលអាកាសធាតុ។ នេះបើយោងតាមការចេញផ្សាយដោយទីភ្នាក់ងារសារព័ត៌មាន AFP នៅថ្ងៃសុក្រ ទី៨ ខែសីហា ឆ្នាំ ២០២៥។

មនុស្សជាច្រើននាក់កំពុងបាត់ខ្លួន បន្ទាប់ពីទឹក និងកាកសំណល់ផ្សេងៗហូរចេញពីជ្រលងភ្នំ ចូលទៅក្នុងទីក្រុង Dharali រដ្ឋ Uttarakhand កាលពីថ្ងៃអង្គារ។ យ៉ាងហោចណាស់ មនុស្សចំនួន ៤នាក់ត្រូវបានបញ្ជាក់ថាស្លាប់ ខណៈ ៥០នាក់មិនទាន់រកឃើញ។ មន្រ្តីរដ្ឋាភិបាលនិយាយថា ទឹកជំនន់នេះបណ្តាលមកពីភ្លៀងធ្លាក់ខ្លាំង។ ប៉ុន្តែ ក្រុមអ្នកជំនាញវាយតម្លៃការខូចខាតលើកឡើងថា វាគ្រាន់តែជាចំណុចមួយក្រោយគេប៉ុណ្ណោះ បន្ទាប់ពីភ្លៀងធ្លាក់ច្រើនថ្ងៃបណ្តាលឱ្យដីសើម ហើយជ្រាយ។

អ្នកជំនាញផ្នែកគ្រោះមហន្តតំបន់ភ្នំហិម៉ាល័យ លោក PK Joshi បាននិយាយថា ទឹកជំនន់ ដូចជាបណ្តាលមកពី ការលាយកម្ទេចកម្ទីនៃផ្ទាំងទឹកកក។ លោក Safi Ahsan Rizvi ទីប្រឹក្សានៃទីភ្នាក់ងារគ្រប់គ្រងគ្រោះមហន្តរាយជាតិ បាននិយាយថា វាអាចទៅរួចដែលថាមូលហេតុ គឺមកពីផ្ទាំងទឹកកករលាយ។ លោក Sandip Tanu Mandal អ្នកជំនាញនៃមូលនិធិ Mobius របស់ទីក្រុង New Delhi ក៏បានចង្អុលបង្ហាញអំពី លទ្ធភាពនៃការលាយកម្ទេចកម្ទីផ្ទាំងទឹកកក ដែលប្រមូលផ្តុំក្នុងទឹកបឹងលាយឡំនឹងទឹកភ្លៀង។

គួរបញ្ជាក់ថា ផ្ទាំងទឹកកកនៅតំបន់ហិម៉ាល័យ ដែលជាប្រភពទឹកដ៏សំខាន់សម្រាប់មនុស្សជិត ២ពាន់លាននាក់ កំពុងរលាយលឿនជាងពេលមុនៗ ដោយសារតែការប្រែប្រួលអាកាសធាតុ ធ្វើឱ្យសហគមន៍នៅតំបន់នោះ ប្រឈមនឹងគ្រោះមហន្តរាយមិនអាចទាយទុក និងមានគ្រោះថ្នាក់ខ្លាំង៕