(វ៉ាស៉ីនតោន)៖ នាថ្ងៃសុក្រ ទី៨ ខែសីហា អាស៊ែបៃហ្សង់និងអាមេនី បានចុះកិច្ចព្រមព្រៀងសន្តិភាពជាមួយគ្នា ដែលសម្រេចបាន​ក្រោមការជួយសម្របសម្រួលពីសហរដ្ឋអាមេរិក អំឡុងជំនួបជាមួយប្រធានាធិបតីអាមេរិក លោក ដូណាល់ ត្រាំ នៅឯសេតវិមាន។ នេះបើតាមការចេញផ្សាយដោយ ទីភ្នាក់ងារព័ត៌មាន Reuters។

កិច្ចព្រមព្រៀងសន្តិភាពខាងលើកើតមានឡើង បន្ទាប់ពីប្រទេសទាំងពីរនេះ មានជម្លោះនឹងគ្នាអស់រយៈពេលជាច្រើនទសវត្សរ៍ ហើយ​វានឹងជួយពួកគេឆ្ពោះទៅរកការធ្វើឱ្យទំនាក់ទំនងទ្វេភាគី មានប្រក្រតីភាពពេញលេញសាជាថ្មី។ ក្នុងពិធីចុះហត្ថលេខា លោក ត្រាំ អមដោយប្រធានាធិបតីអាស៊ែបៃហ្សង់ លោក Ilham Aliyev និងនាយករដ្ឋមន្រ្តីអាមេនី លោក Nikol Pashinyan បាននិយាយដូច្នេះថា «អស់រយៈពេលយូរមកហើយ គឺ៣៥ឆ្នាំ ពួកគេបានប្រយុទ្ធគ្នា ប៉ុន្តែនាពេលនេះពួកគេក្លាយជាមិត្ត ហើយពួកគេនឹងធ្វើជាមិត្តនឹងគ្នាយូរអង្វែងទៅមុខ»។

គួរបញ្ជាក់ថា អាស៊ែបៃហ្សង់និងអាមេនី បានឈ្លោះទាស់ទែងគ្នា ចាប់តាំងតែពីចុងទសវត្សរ៍ឆ្នាំ១៩៨០ នៅពេលតំបន់ Nagorno-Karabakh ដែលជាតំបន់ភ្នំរបស់អាស៊ែបៃហ្សង់ ប៉ុន្តែភាគច្រើនមានជនជាតិដើមអាមេនីរស់នៅ បានបំបែកខ្លួនចេញពីអាស៊ែបៃហ្សង់ ដោយមានការគាំទ្រពីអាមេនី។ កាលពីឆ្នាំ២០២៣ អាស៊ែបៃហ្សង់បានដណ្តើមគ្រប់គ្រងតំបន់ Nagorno-Karabakh ទាំងស្រុងមកវិញ ជាហេតុនាំឱ្យជនជាតិដើមអាមេនីស្ទើរតែទាំង១០០ ០០០នាក់ ដែលរស់នៅ​តំបន់នោះ ភៀសខ្លួនទៅកាន់ប្រទេសអាមេនី។ បើតាមលោក ត្រាំ ប្រទេសទាំងពីរបានឯកភាពគ្នាប្តេជ្ញាបញ្ឈប់ការប្រយុទ្ធគ្នា បើកចំហទំនាក់ទំនងការទូត និងគោរពបូរណភាពទឹកដីរបស់ភាគីម្ខាងៗ៕