(វ៉ាស៉ីនតោន)៖ នាថ្ងៃសុក្រ ទី៨ ខែសីហា ប្រធានាធិបតីអាស៊ែបៃហ្សង់ លោក Ilham Aliyev បានលើកជាយោបល់អំពី​ការដាក់សំណើរួមគ្នាជាមួយអាមេនី ដើម្បីគាំទ្រឱ្យលោក ត្រាំ ទទួលបានពានរង្វាន់ណូបែលសន្តិភាព បន្ទាប់ពីប្រទេសទាំងពីរ បានចុះកិច្ចព្រមព្រៀងសន្តិភាពក្រោមការជួយសម្របសម្រួលពីសហរដ្ឋអាមេរិក។ នេះបើតាមការចេញផ្សាយដោយ ទីភ្នាក់ងារព័ត៌មាន AFP។

ថ្លែងនៅសេតវិមាន លោក Aliyev បាននិយាយដូច្នេះថា «ប្រហែលជាខ្ញុំនឹងឯកភាពគ្នាជាមួយ លោកនាយករដ្ឋមន្រ្តី Nikol Pashinyan (នៃប្រទេសអាមេនី) ដាក់សំណើទៅកាន់គណៈកម្មាធិការណូបែល ដើម្បីជ្រើសរើសប្រធានាធិបតី ដូណាល់ ត្រាំ ជាជ័យលាភីពានរង្វាន់ណូបែលសន្តិភាព»។ ជាមួយគ្នានោះ លោក Pashinyan ក៏បានចូលរួមលើកឡើងដែរថា «ខ្ញុំយល់ថា ប្រធានាធិបតី ត្រាំ ពិតជាសក្តិសមនឹងទទួលបានណូបែលសន្តិភាព។ យើងនឹងគាំទ្រ ហើយនឹងលើកកម្ពស់រឿងនេះ»។

នាថ្ងៃសុក្រសប្តាហ៍នេះ (ពេលវេលានៅសហរដ្ឋអាមេរិក) អាស៊ែបៃហ្សង់និងអាមេនី បានចុះកិច្ចព្រមព្រៀងសន្តិភាពជាមួយគ្នា អំឡុងជំនួបជាមួយលោក ដូណាល់ ត្រាំ នៅសេតវិមាន។ កិច្ចព្រមព្រៀងសន្តិភាពនេះកើតមានឡើង បន្ទាប់ពីប្រទេសទាំងពីរ មានជម្លោះនឹងគ្នាអស់រយៈពេលជាច្រើនទសវត្សរ៍ ហើយ​វានឹងជួយពួកគេឆ្ពោះទៅរកការធ្វើឱ្យទំនាក់ទំនងទ្វេភាគី មានប្រក្រតីភាពពេញលេញសាជាថ្មី។

គួរបញ្ជាក់ថា អាស៊ែបៃហ្សង់និងអាមេនី បានឈ្លោះទាស់ទែងគ្នា ចាប់តាំងតែពីចុងទសវត្សរ៍ឆ្នាំ១៩៨០ នៅពេលតំបន់ Nagorno-Karabakh ដែលជាតំបន់ភ្នំរបស់អាស៊ែបៃហ្សង់ ប៉ុន្តែភាគច្រើនមានជនជាតិដើមអាមេនីរស់នៅ បានបំបែកខ្លួនចេញពីអាស៊ែបៃហ្សង់ ដោយមានការគាំទ្រពីអាមេនី។ កាលពីឆ្នាំ២០២៣ អាស៊ែបៃហ្សង់បានដណ្តើមគ្រប់គ្រងតំបន់ Nagorno-Karabakh ទាំងស្រុងមកវិញ ជាហេតុនាំឱ្យជនជាតិដើមអាមេនីស្ទើរតែទាំង១០០ ០០០នាក់ ដែលរស់នៅ​តំបន់នោះ ភៀសខ្លួនទៅកាន់ប្រទេសអាមេនី។ បើតាមលោក ត្រាំ ប្រទេសទាំងពីរបានឯកភាពគ្នាប្តេជ្ញាបញ្ឈប់ការប្រយុទ្ធគ្នា បើកចំហទំនាក់ទំនងការទូត និងគោរពបូរណភាពទឹកដីរបស់ភាគីម្ខាងៗ៕