(តេហេរ៉ង់)៖ អ៉ីរ៉ង់ បានចាប់ខ្លួនមនុស្សចំនួន ២០នាក់ ដែលសង្ស័យថាបានផ្តល់ព័ត៌មានឱ្យទីភ្នាក់ងារចារកម្ម Mossad របស់អ៉ីស្រាអែល ក្នុងរយៈពេលប៉ុន្មានខែថ្មីៗនេះ ដោយតុលាការបានព្រមានថា ករណីនេះមិនគួរលេីកលែងឱ្យនោះទេ ហើយនឹងត្រូវយកធ្វើជាឧទាហរណ៍។ នេះបេីយោងតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃសៅរ៍ ទី៩ ខែសីហា ឆ្នាំ ២០២៥។

អ្នកនាំពាក្យតុលាការ លោក Asghar Jahangiri បានប្រាប់អ្នកយកព័ត៌មាននៅទីក្រុង Tehran នៅថ្ងៃសៅរ៍នេះថា មានការចោទប្រកាន់លើជនសង្ស័យមួយចំនួនក្នុងចំណោម ២០នាក់ នោះហេីយ ព័ត៌មានលម្អិតពេញលេញនឹងត្រូវបានបង្ហាញជាសាធារណៈ នៅពេលដែលការស៊ើបអង្កេតចប់សព្វគ្រប់។ លោកគូសបញ្ជាក់ថា «ចៅក្រម នឹងមិនបង្ហាញការអត់ឱន ចំពោះអ្នកស៊ើបការណ៍ និងជាភ្នាក់ងារនៃរបបអ៉ីស្រាអែលឡើយ ហើយនឹងសម្រេចយ៉ាងម៉ឺងម៉ាត់ ជាឧទាហរណ៍សម្រាប់អ្នកផ្សេងទៀត»។

គួរបញ្ជាក់ថា កាលពីថ្ងៃពុធ អ៉ីរ៉ង់បានប្រហារជីវិតអ្នកវិទ្យាសាស្ត្រនុយក្លេអ៊ែរម្នាក់ ឈ្មោះ Rouzbeh Vadi ដែលត្រូវបានកាត់ទោសពីបទធ្វើចារកម្មឱ្យអ៉ីស្រាអែល និងជាអ្នកបញ្ជូនព័ត៌មានអំពីអ្នកវិទ្យាសាស្ត្រនុយក្លេអ៊ែរម្នាក់ទៀត ដែលត្រូវបានសម្លាប់នៅក្នុងការវាយប្រហារតាមផ្លូវអាកាសរបស់អ៉ីស្រាអែលលើអ៉ីរ៉ង់ កាលពីខែមិថុនា។ នេះបេីតាមប្រព័ន្ធផ្សព្វផ្សាយរដ្ឋអ៉ីរ៉ង់៕