(អង់រ៉ាកា)៖ រដ្ឋមន្ត្រីការបរទេសតួកគី លោក Hakan Fidan បាននិយាយនៅថ្ងៃសៅរ៍ បន្ទាប់ពីកិច្ចចរចានៅអេហ្ស៉ីបថាប្រទេសមូស្លីមត្រូវតែធ្វើសកម្មភាពរួមគ្នា និងប្រមូលផ្តុំជាអន្តរជាតិប្រឆាំងនឹងផែនការរបស់អ៉ីស្រាអែលក្នុងការគ្រប់គ្រងតំបន់ហ្កាហ្សា។ នេះបេីយោងតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃសៅរ៍ ទី៩ ខែសីហា ឆ្នាំ ២០២៥។

ថ្លែងនៅក្នុងសន្និសីទសារព័ត៌មានរួមនៅទីក្រុង El Alamein ជាមួយសមភាគីអេហ្ស៉ីប លោក Badr Abdelatty លោក Fidan បាននិយាយថា អង្គការសហប្រតិបត្តិការឥស្លាម (OIC) ត្រូវបានកោះហៅទៅកិច្ចប្រជុំបន្ទាន់មួយ។ លោក Fidan លេីកឡេីងថា គោលនយោបាយរបស់អ៉ីស្រាអែលអែលមានបំណងបង្ខំប្រជាជនប៉ាឡេស្ទីន ចាកចេញពីទឹកដីរបស់ពួកគេតាមរយៈភាពអត់ឃ្លាន ហើយដើម្បីឈ្លានពានតំបន់ហ្គាហ្សាជាអចិន្ត្រៃយ៍ ដោយបន្ថែមថា គ្មា នលេសសមហេតុផលសម្រាប់ប្រទេសនានាដើម្បីបន្តគាំទ្រអ៉ីស្រាអែលទៀតនោះទេ។

លោក Abdelatty បាននិយាយថា អ្វីដែលកំពុងកើតឡើងសព្វថ្ងៃនេះ គឺជាការវិវដ្តន៍ដ៏គ្រោះថ្នាក់។ មិនត្រឹមតែសម្រាប់ប្រជាជនប៉ាឡេស្ទីន ឬប្រទេសជិតខាងប៉ុណ្ណោះទេ។ លោក Abdelatty បានបន្ថែមថា ផែនការរបស់អ៉ីស្រាអែល គឺមិនអាចទទួលយកបាន។

គួរបញ្ជាក់ថា OIC បានជំរុញឱ្យមហាអំណាចពិភពលោក និងក្រុមប្រឹក្សាសន្តិសុខអង្គការសហប្រជាជាតិ ប្រេីកិច្ចការច្បាប់ និងមនុស្សធម៌ ហើយចាត់វិធានការជាបន្ទាន់ដើម្បីបញ្ឈប់ផែនការគ្រប់គ្រងហ្កាហ្សា របស់អ៉ីស្រាអែល ខណៈធានាឱ្យបាននូវការទទួលខុសត្រូវភ្លាមៗចំពោះអ្វីដែលហៅថាជាការរំលោភច្បាប់អន្តរជាតិរបស់អ៉ីស្រាអែល៕