(តែលអាវីវ)៖ ក្រុមបាតុកររាប់ម៉ឺននាក់ បានប្រមូលផ្ដុំគ្នាធ្វើបាតុកម្មតវ៉ានៅតាមដងផ្លូវក្នុងទីក្រុងតែលអាវីវ (Tel Aviv) កាលពីយប់ថ្ងៃសៅរ៍ ទី៩ ខែសីហា ដើម្បីបង្ហាញការប្រឆាំងជំទាស់ របស់ពួកគេទៅនឹងផែនការគ្រប់គ្រងតំបន់ហ្កាហ្សារបស់នាយករដ្ឋមន្ត្រីអ៉ីស្រាអែល លោក Benjamin Netanyahu និងទាមទារឱ្យបិទបញ្ចប់សង្រ្គាម ក៏ដូចជាការដោះលែងចំណាប់ខ្មាំង។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters។

កាលពីថ្ងៃសុក្រកន្លងទៅ ការិយាល័យរបស់លោក Netanyahu បានឱ្យដឹងថាគណៈរដ្ឋមន្ត្រីសន្តិសុខអ៉ីស្រាអែលបានអនុម័តលើផែនការរបស់លោក Netanyahu ដើម្បីអនុញ្ញាតឱ្យ យោធាអ៉ីស្រាអែលចូលគ្រប់គ្រងតំបន់ហ្កាហ្សាទាំងមូល ជាមួយការចាប់ផ្ដើមដំណាក់កាលទី១ គឺដណ្ដើមគ្រប់គ្រង Gaza City នៅក្រោមការពង្រីកប្រតិបត្តិការយោធាមួយ បើទោះជាមាន ការប្រឆាំងជំទាស់នៅក្នុងស្រុក និងការព្រមានពីថ្នាក់ដឹកនាំយោធាអ៉ីស្រាអែលថាការធ្វើបែបនេះអាចនឹងបង្កគ្រោះថ្នាក់ដល់អាយុជីវិតចំណាប់ខ្មាំងក៏ដោយ។

ស្ត្រីម្នាក់មានឈ្មោះ Lishay Miran Lavi ដែលជាភរិយារបស់ចំណា​ប់ខ្មាំងឈ្មោះ Omri Miran បានប្រាប់អ្នកសារព័ត៌មានថាការសម្រេចចិត្តរបស់លោក Netanyahu មិនត្រឹមតែជា ការសម្រេចចិត្តយោធាប៉ុណ្ណោះទេ តែក៏អាចក្លាយជាការដាក់ប្រហារជីវិតសម្រាប់ចំណាប់ខ្មាំងផងដែរ។ តាមក្រុមអ្នករៀបចំបាតុកម្មតវ៉ា មានមនុស្សយ៉ាងហោច ១០០ ០០០នាក់ បានចូលរួមក្នុងបាតុកម្មតវ៉ាកាលពីថ្ងៃសៅរ៍។

គួរបញ្ជាក់ថា បើតាមការស្ទង់មតិថ្មីចុងក្រោយបំផុត ប្រជាជនអ៉ីស្រាអែលភាគច្រើនលើសលុប គាំទ្រឱ្យមានការបិទបញ្ចប់សង្រ្គាមជាបន្ទាន់ ដើម្បីនាំទៅរកការដោះលែងចំណាប់ខ្មាំង នៅសេសសល់ប្រហែលជា ៥០នាក់ ដែលកំពុងជាប់ឃុំនៅក្នុងតំបន់ហ្កាហ្សា។ ក្រុមមន្ត្រីអ៉ីស្រាអែលជឿជាក់ថាក្នុងចំណោមចំណាប់ខ្មាំងទាំងនេះមាន ២០នាក់នៅរស់រានមានជីវិត៕