(បែរឡាំង)៖ អធិការបតីអាល្លឺម៉ង់ លោក Friedrich Merz បាននិយាយថារូបលោកសង្ឃឹមថាប្រធានាធិបតីអ៊ុយក្រែន លោក វ៉ូឡូឌីមៀ ហ្សេលេនស្គី នឹងមានវត្តមានចូលរួមនៅក្នុង កិច្ចប្រជុំកំពូលរវាងសហរដ្ឋអាមេរិក និងរុស្ស៉ី។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters។

លោក Friedrich Merz ក្នុងបទសម្ភាសន៍ជាមួយប្រព័ន្ធផ្សព្វផ្សាយអាល្លឺម៉ង់ ARD កាលពីថ្ងៃអាទិត្យ ទី១០ ខែសីហា បានឱ្យដឹងថាលោកនឹងហៅទូរស័ព្ទទៅកាន់ប្រធានាធិបតីអាមេរិក លោក ដូណាល់ ត្រាំ។ «យើងកំពុងខ្នះខ្នែងត្រៀមរៀបចំនៅកម្រិតអឺរ៉ុបរួមគ្នាជាមួយរដ្ឋាភិបាលអាមេរិកសម្រាប់កិច្ចប្រជុំនេះ ហើយយើងសង្ឃឹម និងជឿជាក់ថារដ្ឋាភិបាលអ៊ុយក្រែន រួមទាំង លោកប្រធានាធិបតី ហ្សេលេនស្គី នឹងមានវត្តមានចូលរួមក្នុងកិច្ចប្រជុំនេះដែរ»។ នេះជាការគូសបញ្ជាក់របស់លោក Friedrich Merz។

គួរបញ្ជាក់ថា កាលពីថ្ងៃសុក្រ ទី៨ ខែសីហា ប្រធានាធិបតីអាមេរិក លោក ដូណាល់ ត្រាំ បាននិយាយថា រូបលោកនឹងជួបជាមួយ​ប្រធានាធិបតីរុស្ស៉ី លោក វ៉្លាឌីមៀ ពូទីន នៅថ្ងៃទី១៥ ខែសីហា ក្នុងរដ្ឋ Alaska របស់សហរដ្ឋអាមេរិក។ ប៉ុន្តែ មុនជំនួបនេះកើតឡើង អ៊ុយក្រែនបង្ហាញការព្រួយបារម្ភលោក ត្រាំ និងលោក ពូទីន អាចនឹងព្យាយាមកំណត់លក្ខខណ្ឌដោយមិនមានអ៊ុយក្រែន ចូលរួម ដើម្បីបិទបញ្ចប់សង្រ្គាមជាង៣ឆ្នាំកន្លះមកនេះ ជាពិសេសពាក់ព័ន្ធនឹងរឿងទឹកដីនៃតំបន់ភាគខាងកើតអ៊ុយក្រែន។

លោក ហ្សេលេនស្គី ក៏បានបញ្ជាក់ទុកមុនដែរថាអ៊ុយក្រែននឹងមិនយល់ព្រមកាត់ទឹកដីឱ្យរុស្ស៉ីនោះទេ៕