(វ៉ាស៊ីនតោន)៖ ប្រធានាធិបតីអាមេរិក លោក ដូណាល់ ត្រាំ កាលពីថ្ងៃអាទិត្យ ទី១០ ខែសីហា បាននិយាយថានឹងបណ្ដេញជនគ្មានផ្ទះសម្បែងទៅរស់នៅឱ្យឆ្ងាយពីរដ្ឋធានីវ៉ាស៊ីនតោន និងចាប់ ពួកឧក្រិដ្ឋជនដាក់គុក បើទោះជាក្រុមមន្ត្រីក្នុងរដ្ឋធានីបានអះអាងថាបច្ចុប្បន្នគ្មានការកើនឡើងបទល្មើសក៏ដោយ។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters។

ខណៈផែនការខាងលើមិនទាន់មានការបញ្ជាក់ឱ្យច្បាស់ មន្ត្រីអាមេរិមម្នាក់បានប្រាប់ទីភ្នាក់ងារសារព័ត៌មាន Reuters ថារដ្ឋបាលរបស់លោក ត្រាំ បាន និងកំពុងត្រៀមលក្ខខណៈដាក់ពង្រាយ កងទ័ពឆ្មាំជាតិរាប់រយនាក់ទៅកាន់រដ្ឋធានីវ៉ាស៊ីនតោន ជាវិធីសាស្ត្រដ៏ចម្រូងចម្រាសមួយដែលលោក ត្រាំ ធ្លាប់បានយកមកប្រើកាលពីពេលថ្មីៗនេះក្នុងទីក្រុង Los Angeles ដើម្បីបង្ក្រាប បាតុកម្មតវ៉ារបស់ជនអន្តោប្រវេសន៍។

លោក ត្រាំ បានសរសេរក្នុងការបង្ហោះមួយលើបណ្ដាញទំនាក់ទំនងសង្គម Truth Social ថា «ជនគ្មានផ្ទះសម្បែងត្រូវតែរើចេញជាបន្ទាន់។ យើងនឹងមិនផ្ដល់កន្លែងឱ្យពួកអ្នកស្នាក់នៅនោះទេ ប៉ុន្តែលើកលែងតែនៅឱ្យឆ្ងាយពីរដ្ឋធានី។ ពួកឧក្រិដ្ឋជន ពួកអ្នកមិនចាំបាច់រើចេញទេ ពីព្រោះយើងនឹងចាប់ពួកអ្នកឯងដាក់គុក»។ ប៉ុន្តែបើតាមមន្ត្រីអាមេរិករូបនេះដដែល លោក ត្រាំ មិនទាន់ធ្វើ ការសម្រេចចិត្តចុងក្រោយនៅឡើយទេ ជុំវិញការបណ្ដេញជនគ្មានផ្ទះសម្បែងចេញពីរដ្ឋធានីវ៉ាស៊ីនតោន។

គួរបញ្ជាក់ថា លោក ដូណាល់ ត្រាំ មានគម្រោងធ្វើសន្និសីទសារព័ត៌មានមួយនៅថ្ងៃចន្ទដើមសប្ដាហ៍នេះ ស្ដីពីការបញ្ឈប់ឧក្រិដ្ឋកម្មហិង្សានៅក្នុងរដ្ឋធានីវ៉ាស៊ីនតោន ហើយវាមិនទាន់ច្បាស់ថាតើ លោកនឹងប្រកាសពីព័ត៌មានលម្អិតបន្ថែមលើការបណ្ដេញជនគ្មានផ្ទះសម្បែងចេញពីរដ្ឋធានីវ៉ាស៊ីនតោន ឬក៏យ៉ាងណានោះទេ៕