(សេអ៊ូល)៖ កូរ៉េខាងត្បូង និងវៀតណាម នឹងសន្យាធ្វើឱ្យកិច្ចសហប្រតិបត្តិការសេដ្ឋកិច្ច ​និងយុទ្ធសាស្រ្តកាន់តែស៉ីជម្រៅ នៅពេលដែលមេដឹកនាំរបស់ខ្លួនចូលរួមកិច្ចប្រជុំ នាថ្ងៃចន្ទ ទី១១ ខែសីហា ខណៈអតីតគូសត្រូវសម័យសង្រ្គាមត្រជាក់ទាំងពីរនេះ ព្យាយាមបង្កើនទំនាក់ទំនងអាជីវកម្ម ចំពោះមុខបរិយាកាសពាណិជ្ជកម្មពិភពលោកដ៏ស្មុគស្មាញ។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters។

លោក Lee Jae Myung ត្រូវស្វាគមន៍ប្រធានាធិបតីវៀតណាម លោក Lam To ហើយនឹងពិភាក្សាអំពីការលើកកម្ពស់ពាណិជ្ជកម្ម និងការវិនិយោគនៅក្នុងប្រទេសអាស៊ានមួយនេះ។ លោក Lam ដែលជាអគ្គលេខាបក្សកុម្មុយនិស្តវៀតណាមផងនោះ បានដឹកនាំគណៈប្រតិភូនៃក្រសួងឧស្សាហកម្ម ពាណិជ្ជកម្ម ការបរទេស និងបច្ចេកវិជ្ជា ព្រមទាំងសមាជិកជាន់ខ្ពស់របស់បក្ស និងសមាជិកសភាទៅកាន់កូរ៉េខាងត្បូង ក្នុងដំណើរទស្សនកិច្ចផ្លូវរដ្ឋរយៈពេល ៤ថ្ងៃ។

តាមការិយាល័យប្រធានាធិបតីកូរ៉េខាងត្បូង ប្រទេសទាំងពីរ គ្រោងចុះហត្ថលេខាលើអនុស្សរណៈយោគយល់គ្នា យ៉ាងហោចណាស់ ១០ ជាមួយការសន្យាធ្វើកិច្ចសហប្រតិបត្តិការលើវិស័យនុយក្លេអ៊ែរ និងថាមពលកកើតឡើងវិញ គោលនយោបាយរូបិយវត្ថុ និងហិរញ្ញវត្ថុ ក៏ដូចជាវិទ្យាសាស្ត្រ និងបច្ចេកវិទ្យា។

គួរបញ្ជាក់ថា ក្រុមហ៊ុនកូរ៉េខាងត្បូងធំៗមួយចំនួនរួមទាំង Samsung Electronics បានប្រើប្រាស់វៀតណាមជាមជ្ឈមណ្ឌលនាំចេញ ដោយទទួលបានអត្ថប្រយោជន៍ច្រើនឆ្នាំមកហើយ អំពីតម្លៃពលកម្មទាប ការលើកទឹកចិត្តនានា និងកិច្ចព្រមព្រៀងពាណិជ្ជកម្មសេរីរបស់ទីក្រុងហាណូយជាមួយប្រទេសរាប់សិបផ្សេងទៀត។ ប៉ុន្តែគោលនយោបាយពាណិជ្ជកម្មរបស់លោក ត្រាំ ប្រធានាធិបតីអាមេរិក បានបង្កើនភាពមិនច្បាស់លាស់ ចំពោះការប្តេជ្ញាចិត្តផ្នែកអាជីវកម្មនាពេលអនាគត។ លោក ត្រាំ បានដាក់អត្រាពន្ធ ១៥ភាគរយសម្រាប់ទំនិញកូរ៉េខាងត្បូង និង ២០ភាគរយសម្រាប់ការនាំចូលពីវៀតណាម៕