(Reuters)៖ រដ្ឋាភិបាលនៃប្រទេសអូស្រ្តាលី កាណាដា និងចក្រភពអង់គ្លេស បានថ្កោលទោសនូវអ្វីដែលខ្លួនចាត់ទុកថា ជាការគាបសង្កត់ និងការរំលោភសិទ្ធិមនុស្សនៅបេឡារុស ហើយការចោទប្រកាន់អាជ្ញាធរ ថាបានធ្វើយុទ្ធនាការបំបិទសំឡេងសង្គមស៉ីវិល ប្រព័ន្ធផ្សព្វផ្សាយឯករាជ្យ និងសកម្មភាពប្រឆាំងផ្នែកនយោបាយ។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃចន្ទ ទី១១ ខែសីហា ឆ្នាំ ២០២៥។

ប្រទេសទាំង ៣បានចេញសេចក្តីថ្លែងការណ៍រួម ដែលមានខ្លឹមសារថា «មនុស្សរាប់ពាន់នាក់ ត្រូវបានឃុំឃាំងដោយអយុត្តិធម៌ ទទួលរងការធ្វើទារុណកម្ម ឬបង្ខំឱ្យនិរទេសខ្លួន។ សកម្មភាពទាំងនេះ តំណាងឱ្យការរំលោភកាតព្វកិច្ចច្បាប់អន្តរជាតិពីបេឡារុស និងជាការរំលោភយ៉ាងធ្ងន់ធ្ងរលើសិទ្ធិមនុស្ស និងសេរីភាពជាមូលដ្ឋាន។ សូមស្នើឱ្យអាជ្ញាធរបេឡារុស បញ្ចប់យុទ្ធនាការបស់ខ្លួន»។

គួរបញ្ជាក់ថា ប្រធានាធិបតីបេឡារុស លោក Alexander Lukashenko បដិសេធថានៅបេឡារុស មិនមានអ្នកទោសនយោបាយឡើយ។ មនុស្សរាប់រយនាក់ដែលត្រូវបានកាត់ទោសពីបទជ្រុលនិយម និងបទល្មើសពាក់ព័ន្ធនយោបាយផ្សេងទៀត ត្រូវបានដោះលែង តាំងពីពាក់កណ្តាលឆ្នាំ ២០២៤។ ​យ៉ាងនេះក្តី ​ក្រុម​សិទ្ធិ​មនុស្ស​និយាយ​ថា នៅតែមានមនុស្សជិត ១ ២០០​នាក់ស្ថិតក្រោមការបង្ខាំងទុក៕