(វែលីងតោន)៖ នៅថ្ងៃចន្ទ ទី១១ ខែសីហា រដ្ឋមន្រ្តីការបរទេសនូវែលសេឡង់ លោក Winston Peters បាននិយាយថា ប្រទេសរបស់លោក នឹងពិចារណាលើការទទួលស្គាល់រដ្ឋប៉ាឡេស្ទីន។ នេះបើតាមការចេញផ្សាយដោយ ទីភ្នាក់ងារព័ត៌មាន Reuters។

លោក Peters បាននិយាយថា គណៈរដ្ឋមន្រ្តីរបស់នាយករដ្ឋមន្រ្តីនូវែលសេឡង់ លោក Christopher Luxon នឹងធ្វើការសម្រេចចិត្តផ្លូវការមួយ នៅខែកញ្ញា ហើយនឹងប្រកាសគោលជំហររបស់រដ្ឋាភិបាល នៅមហាសន្និបាតអង្គការសហប្រជាជាតិ (UN)។​ លោក Peters បានបន្តថា ស្របពេលដែលដៃគូជិតស្និទ្ធមួយចំនួនរបស់នូវែលសេឡង់ បានជ្រើសរើសនឹងទទួលស្គាល់រដ្ឋប៉ាឡេស្ទីន នូវែលសេឡង់មានគោលនយោបាយការបរទេសមួយ ដែលឯករាជ្យម្ចាស់ការ។

លោករដ្ឋមន្រ្តីការបរទេសនូវែលសេឡង់ បានសង្កត់ធ្ងន់ដូច្នេះថា «យើងចង់ថ្លឹងថ្លែងលើបញ្ហានេះឱ្យល្អិតល្អន់ ហើយដើរស្របទៅតាម​គោលការណ៍ គុណតម្លៃ និងផលប្រយោជន៍ជាតិរបស់ប្រទេសយើង។ រដ្ឋាភិបាលនូវែលសេឡង់ ត្រូវការពិចារណាឱ្យហ្មត់ចត់ថា តើមានវឌ្ឍនភាពគ្រប់គ្រងត្រូវបានធ្វើឡើងដែរឬទេ សម្រាប់ឱ្យដែនដីប៉ាឡេស្ទីនក្លាយជារដ្ឋឋិតថេរនិងស្របច្បាប់មួយ ដែលគួរបានការទទួលស្គាល់ពីនូវែលសេឡង់»។

គួរបញ្ជាក់ថា ប៉ុន្មានសប្តាហ៍ចុងក្រោយនេះ ប្រទេសមួយចំនួន រួមមានទាំងចក្រភពអង់គ្លេស បារាំង កាណាដា បានប្រកាសថា ពួកគេនឹងប្រកាសទទួលស្គាល់រដ្ឋប៉ាឡេស្ទីន អំឡុងព្រឹត្តិការណ៍មហាសន្និបាត UN នាខែកញ្ញាខាងមុខ ប្រសិនបើសង្រ្គាមរបស់អ៉ីស្រាអែលនៅតំបន់ហ្កាហ្សា ដែលជាផ្នែកនៃដែនដីប៉ាឡេស្ទីន នៅតែមិនទាន់បញ្ចប់ទេនោះ៕