(កង់បេរ៉ា)៖ នៅថ្ងៃចន្ទ ទី១១ ខែសីហា នាយករដ្ឋមន្រ្តីអូស្ត្តាលី លោក Anthony Albanese បាននិយាយថា ប្រទេសអូស្រ្តាលី នឹងទទួលស្គាល់រដ្ឋប៉ាឡេស្ទីននៅខែកញ្ញា អំឡុងមហាសន្និបាតអង្គការសហប្រជាជាតិ (UN) ដើម្បីចូលរួមជំរុញដំណោះស្រាយរដ្ឋពីរ សម្រាប់ជម្លោះអ៉ីស្រាអែល-ប៉ាឡេស្ទីន។ នេះបើតាមការចេញផ្សាយដោយ ទីភ្នាក់ងារព័ត៌មាន Reuters។

លោក Albanese បាននិយាយក្នុងសេចក្តីថ្លែងការណ៍ថា «អូស្រ្តាលីនឹងទទួលស្គាល់រដ្ឋប៉ាឡេស្ទីន អំឡុងសម័យប្រជុំទី៨០ នៃមហាសន្និបាត UN ក្នុងខែកញ្ញា ដើម្បីចូលរួមចំណែកក្នុងសន្ទុះអន្តរជាតិ ឆ្ពោះទៅរកដំណោះស្រាយរដ្ឋពីរ បទឈប់បាញ់ហ្កាហ្សា និងការដោះលែងចំណាប់ខ្មាំងនៅសេសសល់»។

លោកនាយករដ្ឋមន្រ្តីអូស្រ្តាលី បានបន្តទៀតថា «ដំណោះស្រាយរដ្ឋពីរ គឺជាក្តីសង្ឃឹមប្រសើរជាងគេបំផុតសម្រាប់មនុស្សជាតិ ដើម្បីបំបែកវដ្តនៃអំពើហិង្សានៅតំបន់មជ្ឈិមបូព៌ា ហើយនាំមកនូវការបញ្ចប់ជម្លោះ ភាពរងទុក្ខវេទនា និងគ្រោះទុរ្ភិក្សនៅហ្កាហ្សា»។ លោក Albanese បានបន្ថែមថា កាលពីថ្ងៃព្រហស្បតិ៍សប្តាហ៍មុន រូបលោកបានសន្ទនាទូរសព្ទជាមួយ នាយករដ្ឋមន្រ្តីអ៉ីស្រាអែល លោក Benjamin Netanyahu ហើយបានប្រាប់លោក Netanyahu ថា ដំណោះស្រាយនយោបាយ គឺត្រូវការជាចាំបាច់ មិនមែនដំណោះស្រាយតាមផ្នែកយោធានោះទេ។

គួរបញ្ជាក់ថា កាលពីសប្តាហ៍កន្លងទៅ អូស្រ្តាលីបានរិះគន់ផែនការរបស់អ៉ីស្រាអែល ក្នុងការគ្រប់គ្រងយោធាលើតំបន់ហ្កាហ្សាទាំងមូល ហើយលោក Albanese បានលើកឡើងថា ការសម្រេចចិត្តទទួលស្គាល់រដ្ឋប៉ាឡេស្ទីន កាន់តែត្រូវបានជំរុញថែមទៀត ដោយសារតែភាពមិនអើពើរបស់លោក Netanyahu ចំពោះការអំពាវនាវយ៉ាងទទូចរបស់សហគមន៍អន្តរជាតិ និងការមិនគោរពកាតព្វកិច្ចផ្លូវច្បាប់ និងកាតព្វកិច្ចសីលធម៌នៅហ្កាហ្សា៕