(កៀវ)៖ នៅថ្ងៃចន្ទ ទី១១ ខែសីហា រុស្ស៉ីបានអះអាងថា មនុស្សយ៉ាងហោច៣នាក់ បានបាត់បង់ជីវិតនៅប្រទេសរបស់ខ្លួន ក្នុងការវាយប្រហារដោយប្រើយន្តហោះដ្រូនរបស់អ៊ុយក្រែន កាលពីវេលាយប់កន្លងទៅ។ នេះបើតាមការចេញផ្សាយដោយ ទីភ្នាក់ងារព័ត៌មាន Reuters។

ក្នុងចំណោមនោះ មនុស្ស២នាក់បានស្លាប់ និង២នាក់បានរងរបួស ក្រោយការវាយប្រហារកាលពីយប់ពាក់កណ្តាលអធ្រាត្រថ្ងៃអាទិត្យ ឈានចូលថ្ងៃចន្ទ លើតំបន់ Tula ដែលនៅជាប់ភាគខាងត្បូងតំបន់រដ្ឋធានីមូស្គូ។ តំបន់មូស្គូក៏បានស្ថិតក្រោមគោលដៅវាយប្រហាររបស់ដ្រូនអ៊ុយក្រែនផងដែរ។ រីឯមនុស្សម្នាក់ទៀតបានស្លាប់ និង២នាក់រងបួស ក្រោយការវាយប្រហាររបស់អ៊ុយក្រែន លើតំបន់ឧស្សាហកម្មនៅតំបន់ Nizhny Novgorod ភាគខាងលិចប្រទេសរុស្ស៉ី។

ក្រសួងការពារជាតិរុស្ស៉ី បាននិយាយថា កងកម្លាំងការពារដែនអាកាសរុស្ស៉ី បានបាញ់កម្ទេចដ្រូនអ៊ុយក្រែនសរុប៥៩គ្រឿង កាលពីវេលាយប់កន្លងទៅ ក្នុងនោះ១២គ្រឿងនៅលើតំបន់ Tula និង២គ្រឿងនៅលើតំបន់មូស្គូ។

គួរបញ្ជាក់ថា ទាំងអ៊ុយក្រែននិងរុស្ស៉ី សុទ្ធតែបដិសេធដូចគ្នាថា មិនបានកំណត់គោលដៅលើជនស៉ីវិលឡើយ ក្នុងការវាយប្រហារតាមផ្លូវអាកាសទៅវិញទៅមករបស់ខ្លួន។ ទោះជាបែបនេះក្តី ជនស៉ីវិលរាប់ពាន់នាក់បានបាត់បង់ជីវិត នៅក្នុងសង្រ្គាមដែលផ្ទុះឡើង នៅពេលរុស្ស៉ីបើកការឈ្លានពានលើអ៊ុយក្រែន កាលពីខែកុម្ភៈ ឆ្នាំ២០២២៕