(ដាក្កា)៖ ប្រទេសបង់ក្លាដែស បាននិងកំពុងរកឃើញនូវការកើនឡើងជំងឺគ្រុនឈាម និងបណ្តាលឱ្យមានអ្នកស្លាប់ ដោយអ្នកជំនាញសុខាភិបាលព្រមានថា នៅខែសីហានេះ នឹងផ្ទុះឡើងកាន់តែធ្ងន់ធ្ងរដោយសារតែសត្វមូស ប្រសិនបើមិនចាត់វិធានការបន្ទាន់។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃចន្ទ ទី១១ ខែសីហា ឆ្នាំ ២០២៥។

ជំងឺគ្រុនឈាម បានសម្លាប់មនុស្ស ១០១នាក់ និងមានអ្នកឆ្លងចំនួន ២២ ១៨៣នាក់ហើយរហូតមកដល់នេះ ដោយបានដាក់សម្ពាធថែមទៀតលើប្រព័ន្ធថែទាំសុខភាព ដែលទ្រុឌទ្រោមស្រាប់។ ការកើនឡើងយ៉ាងខ្លាំងនៃអ្នកស្លាប់ កើតមានដំណាលគ្នានឹងអ្នកឆ្លង។

លោក Kabirul Bashar អ្នកជំនាញនៅសាកលវិទ្យាល័យ Jahangirnagar បញ្ជាក់ថា «ស្ថានភាពនេះគឺធ្ងន់ធ្ងរ។ មេរោគគ្រុនឈាមបានរីករាលដាលរួចទៅហើយ នៅទូទាំងប្រទេស ប្រសិនបើគ្មានកិច្ចអន្តរាគមន៍ខ្លាំងក្លាទេនោះ មន្ទីរពេទ្យនឹងត្រូវគ្របដណ្ដប់ដោយអ្នកជំងឺ»។

ក្រុមមន្ត្រី​សុខាភិបាល បាន​ជំរុញ​ឱ្យ​ពលរដ្ឋ​ប្រើ​ថ្នាំ​បាញ់​មូស សម្រាកក្នុង​មុង និង​លុប​បំបាត់​ទឹកដែលអាចកើតមូស។ ខណៈចូលដល់រដូវកាលគ្រុនឈាម អ្នកជំនាញសុខាភិបាលបានសង្កត់ធ្ងន់ លើការចូលរួមរបស់សហគមន៍ជាមួយរដ្ឋាភិបាល ដើម្បីកម្ចាត់មូស និងទប់ស្កាត់នូវការរីករាលដាលដ៏អាក្រក់បំផុត សម្រាប់បង់ក្លាដែស៕