(YANGON)៖ ក្រុមប្រដាប់អាវុធដ៏មានឥទ្ធិពលមួយក្រុម នៅក្នុងប្រទេសមីយ៉ាន់ម៉ា បានប្តេជ្ញាថានឹងរារាំងការបោះឆ្នោត ក្នុងតំបន់ដែលខ្លួនកំពុងគ្រប់គ្រង ហើយបដិសេធបំណងរៀបចំការបោះឆ្នោតរៀបចំដោយរដ្ឋាភិបាលយោធា ដែលជាជំហានឆ្ពោះទៅរកការបញ្ចប់សង្រ្គាមស៉ីវិល។ នេះបើយោងតាមការចេញផ្សាយដោយទីភ្នាក់ងារសារព័ត៌មាន AFP នៅថ្ងៃចន្ទ ទី១១ ខែសីហា ឆ្នាំ ២០២៥។

ក្រុម Arakan Army បានលេចចមុខជាគូប្រជែងដ៏សំខាន់ សម្រាប់ឧត្តមសេនីយដែលកំពុងកាន់អំណាចរបស់មីយ៉ាន់ម៉ា ចាប់តាំងពីរដ្ឋប្រហារយោធាឆ្នាំ ២០២១ ដែលបង្កជាសង្រ្គាមសព្វថ្ងៃ ហើយគ្រប់គ្រងស្ទើរតែទាំងអស់នៃរដ្ឋរ៉ាឃីនភាគខាងលិច។ អ្នកនាំពាក្យរបស់ Arakan Army លោក Khaing Thu Kha បាននិយាយថា ការបោះឆ្នោតនឹងត្រូវបានរារាំងពី តំបន់នានានៃរដ្ឋរ៉ាឃីន ដែលខ្លួនកំពុងគ្រប់គ្រងចំនួន ១៤ទីតាំងនៃក្រុងទាំង ១៧របស់រដ្ឋ។ អ្នកនាំពាក្យរូបនេះគូសបញ្ជាក់ថា «ការបោះឆ្នោតដែលមិនមានការគាំទ្រជាសាធារណៈ នឹងគ្មានប្រយោជន៍សម្រាប់ពលរដ្ឋឡើយ ហើយបង្កើតបានតែរឿងភ័ន្តច្រឡំ»។

គួរបញ្ជាក់ថា តាមការប៉ាន់ស្មានរបស់រដ្ឋាភិបាលយោធា រដ្ឋរ៉ាឃីនដែលនៅជាប់នឹងប្រទេសបង់ក្លាដែស មានប្រជាជន ២.៥លាននាក់ ក្នុងចំណោមប្រជាជនមីយ៉ាន់ម៉ាសរុប ៥១លាននាក់៕