(ប៉េកាំង)៖ «ទឹកថ្លា ភ្នំបៃតង ជាភ្នំមាស ភ្នំប្រាក់» ដែលជាទស្សនៈប្រកបដោយគុណតម្លៃមហាសាលរបស់លោក Xi Jinping ដោយបានផ្តើមកាលពីថ្ងៃទី១៥ ខែសីហា ឆ្នាំ២០០៥ ក្នុងអំឡុងពេលដំណើរទស្សនកិច្ចរបស់លោកទៅកាន់ភូមិYucun សង្កាត់ Anji ខេត្ត Zhejiang បានក្លាយជាគោលគំនិតផ្តល់សារៈសំខាន់ដល់ការអភិរក្សអេកូឡូស៊ី និងការអភិវឌ្ឍប្រកបដោយចីរភាពរបស់ប្រទេសចិន រយៈពេល២០ឆ្នាំកន្លងមកនេះ។

ទស្សនៈនេះបាននិងកំពុងជំរុញរបៀបអភិវឌ្ឍបៃតង និងរបៀបរស់នៅបៃតង ហើយធ្វើឲ្យមានតុល្យភាពរវាងកំណើនសេដ្ឋកិច្ច និងការការពារបរិស្ថានអេកូឡូស៊ី ដោយបានគូសរំលេចយ៉ាងប្រត្យក្សថា ប្រជាជនចិនក្នុងរយៈពេល២០ឆ្នាំនេះ បានការពារប្រព័ន្ធបរិស្ថានអេកូឡូស៊ីប្រៀបដូចជាការការពារនេត្រារបស់ខ្លួន ហើយចាត់ទុក «ទឹកថ្លា ភ្នំបៃតង ជាភ្នំមាស ភ្នំប្រាក់» ជាការថែររក្សាជីវិតរបស់ខ្លួនដូច្នោះដែរ។

តាមរយៈកំណើន GDPសម្រាប់ជនជាតិចិនម្នាក់ៗក្នុងឆ្នាំ២០០៥ មានចំនួន១៧០០ដុល្លារអាមេរិក បានកើនដល់១៣៧៧៨ដុល្លារអាមេរិក ក្នុងឆ្នាំ២០២៥ (តាមការប៉ាន់ស្មាន) ជាសក្ខីភាពបញ្ជាក់ថា សេដ្ឋកិច្ចបៃតងរបស់ប្រទេសចិ នកំពុងផ្តល់សន្ទុះកាន់តែខ្លាំងដល់ជីវភាពរស់នៅរបស់ប្រជាជនចិន។ បន្ថែមពីលើនេះ អាយុមរណភាពគិតជាមធ្យម សម្រាប់ជនជាតិចិនបានកើនពីអាយុ៧៤ឆ្នាំ ក្នុងឆ្នាំ២០០៥ដល់អាយុ៨៣,១ឆ្នាំក្នុងឆ្នាំ២០២៥ ដែលជាការគូសរំលេចពីវិបុលភាព នៃជីវភាពរស់នៅរបស់ប្រជាជនចិនក្រោមទម្រ នៃអរិយធម៌អេកូឡូស៊ីដែលបានផ្តើមចេញដំណើរពីទស្សនៈ «ទឹកថ្លា ភ្នំបៃតង ជាភ្នំមាស ភ្នំប្រាក់» ហើយបាននាំប្រទេសចិនសម្រេចបាន នូវការអភិវឌ្ឍប្រកបដោយចីរភាពមុនកាលកំណត់នៃរបៀបវារៈ របស់អង្គការសហប្រជាជាតិសម្រាប់ឆ្នាំ២០៣០។

«ទឹកថ្លា ភ្នំបៃតង ជាភ្នំមាស ភ្នំប្រាក់» ដែលបានចេញដំណើររយៈពេល២០ឆ្នាំនេះ បានក្លាយជាម្តាយបង្កើតរបស់ «ទិវាជាតិអេកូឡូស៊ី» របស់ប្រទេសចិនចាប់ពីឆ្នាំ២០២៣មក ហើយបានចាក់បញ្ចូលនូវសមាសធាតុដ៏សំខាន់ ដល់សេចក្តីសម្រេចនិងរាល់ផែនការរបស់ គណៈកម្មាធិការមជ្ឈិមបក្សលើការអភិវឌ្ឍអរិយធម៌អេកូឡូស៊ី ហើយលើកទឹកចិត្តដល់សកម្មភាពរបស់រដ្ឋាភិបាលចិន ក្នុងកិច្ចខិតខំបង្កើនភាពកាន់តែប្រពៃនៃបរិស្ថានរបស់ប្រទេសចិន ដើម្បីប្រែក្លាយប្រទេសចិនដ៏ស្រស់ស្អាត និងពោរពេញដោយសន្តិសុខអេកូឡូស៊ីទៅជា ឧទ្យានបុប្ឆាសកលសម្រាប់ គំរូភាពរបស់ពិភពលោក។

មនុស្សជាតិបានយល់ស្របគ្នាថា នេះគឺជាពេលវេលាដ៏សមស្របមួយ ដែលយើងត្រូវប្រកៀកស្មារគ្នា ជាប់ជានិច្ចជាមួយប្រទេសចិន ដែលជាជើងឯកការពារបរិស្ថានអេកូឡូស៊ី ហើយដកបទពិសោធន៍ពីប្រទេសចិន ដែលពោរពេញដោយលទ្ធភាពក្នុងការសម្រេចបាន លើភារកិច្ចដ៏មហិមានេះក្នុងការសង្គ្រោះបរិស្ថានពិភពលោក នាំយកមេឃពណ៌ខៀវជូនដល់មនុស្សជាតិវិញ។ ជាក់ស្តែង ប្រទេសចិនបានកែសម្រួលដីដើម្បីដាំព្រៃប្រមាណពី១៩៣លានហិកតាក្នុងឆ្នាំ២០០៥ ដល់២២០លានហិកតាក្នុងឆ្នាំ២០២៥ ឬប្រមាណ២៥%នៃផ្ទៃដីសរុបរបស់ប្រទេសចិន ស្របពេលដែលប្រទេសចិនក៏ជាជើងឯក ដែលមានផ្ទៃដីតំបន់ដីសើម ធំជាងគេបង្អស់នៅក្នុងពិភពលោកផងដែរ។

បន្ថែមពីលើនេះ ប្រទេសចិនបាននិងកំពុងកៀកជាប់ជាមួយនូវផែនការរបស់ខ្លួនក្នុងការសម្រេចបាននូវ “ការបំភាយឧស្ម័នកម្រិតខ្ពស់បំផុត មុនឆ្នាំ២០៣០” និង “អព្យាក្រឹតភាពកាបូនមុនឆ្នាំ២០៦០” ដែលជាផែនការប្រតិបត្តិប្រកបដោយប្រសិទ្ធភាព និងស័ក្តិសិទ្ធិភាពនាំប្រទេសចិនកំពុងដើរតួនាទីជា ប្រទេសគំរូមួយលើឆាកអន្តរជាតិ ក្នុងការកសាងពិភពលោកមួយឆ្ពោះទៅរក ការអភិវឌ្ឍបៃតងប្រកបដោយភាពស្រស់បំព្រង បរិស្ថានល្អ និងការអភិវឌ្ឍប្រកបដោយចីរភាព។

«ទឹកថ្លា ភ្នំបៃតង ជាភ្នំមាស ភ្នំប្រាក់» ដែលបានចេញដំណើររយៈពេល២០ឆ្នាំនេះ បានជំរុញល្បឿននៃនវានុវត្តបៃតងរបស់ ប្រទេសចិនដោយបង្កើនការផលិតនាំចេញរថយន្តអគ្គិសនី ការប្រើប្រាស់ថាមពលស្អាតបានមកពីពន្លឺព្រះអាទិត្យ កម្លាំងទឹក និង ថាមពលខ្យល់ ដោយបានចែករំលែកបទពិសោធន៍ដ៏មហាសាលរបស់ប្រទេសចិន បន្ស៊ីរួមគ្នាជាមួយការអភិវឌ្ឍ របស់បណ្តាប្រទេសនានា ជាពិសេសបណ្តាប្រទេសសកលខាងត្បូងឱ្យទទួលបាន នូវវឌ្ឍនភាពរីកចម្រើនសេដ្ឋកិច្ចបៃតង របស់ខ្លួនផងដែរ។

ដោយសារកំណើនលក់រថយន្តអគ្គិសនីរបស់ក្រុមហ៊ុន BVD កាន់តែកើនឡើងជាលំដាប់ បានផ្តល់បច្ច័យទានជាបណ្តើរៗ ឱ្យប្រទេសកាន់តែច្រើន បានសម្រេចទាក់ទាញក្រុមហ៊ុនរថយន្ត BVDទៅសាងសង់រោងចក្រផលិតរថយន្តអគ្គិសនី ក្នុងប្រទេសរបស់ខ្លួន ជាក់សែ្តង រោងចក្រតម្លើងរថយន្ត BYD នៅកម្ពុជាបានចាប់ផ្តើមដំណើរការសាងសង់ពីខែមេសា ឆ្នាំ២០២៥ នឹងបញ្ចប់ការសាងសង់នៅក្នុងខែតុលា ហើយចាប់ផ្តើមដំណើការផលិតកម្មតម្លើងរថយន្តអគ្គិសនីជាលើកដំបូងនៅកម្ពុជា នាដើមខែវិច្ឆិកា ឆ្នាំ២០២៥ ដែលនេះជាដំណើរការបទពិសោធន៍របស់ប្រទេសចិនក្នុងពន្លឿន ការផ្លាស់ប្តូររបៀប នៃកំណើនសេដ្ឋកិច្ចរបស់ខ្លួនទៅកាន់ពិភពលោក ដើម្បីធ្វើឲ្យពិភពលោកមានភាពប្រសើរឡើងនៃប្រព័ន្ធបរិស្ថានអេកូឡូស៊ី ការអភិវឌ្ឍទូលំទូលាយ ការប្រើប្រាស់ថាមពលស្អាត និងអព្យាក្រឹត្យភាពនៃការបំភាយឧស្ម័នដោយពឹងផ្អែកលើ នវានុវត្តន៍ដើម្បីបន្តការអភិវឌ្ឍក្នុងការជំរុញ នវានុវត្តតម្រង់ឆ្ពោះទៅរកអនាគតកាន់តែប្រពៃសម្រាប់វិបុលភាពរបស់មនុស្សជាតិ។

«ទឹកថ្លា ភ្នំបៃតង ជាភ្នំមាស ភ្នំប្រាក់» ដែលបានចេញដំណើររយៈពេល២០ឆ្នាំនេះ បានលើសពីប្រទេសចិនដើរឆ្ពោះទៅសម្រេចបាន នូវកម្លាំងសាមគ្គីរួមគ្នារបស់មនុស្សជាតិស្របតាមគោលគំនិត នៃកិច្ចកសាងសហគមន៍រួមជីវិតសុខដុមនីយកម្មរវាងមនុស្ស និងធម្មជាតិ ដោយទទួលស្គាល់ថា «ប្រទេសចិនស្អាត» ជាប្រភពដ៏សំខាន់នៃសេចក្តីប្រាថ្នារួមរបស់មនុស្សជាតិ ដោយជំរុញកិច្ចកសាងសហគមន៍ ដែលមានជោគវាសនាផ្សារភ្ជាប់គ្នាដោយចាត់ទុកថា ផែនដីជាផ្ទះរួមរបស់យើង និងព្រមព្រៀងគ្នាទទួលយកទស្សនវិជ្ជាចិនរបស់ទស្សនវិទូឡៅជឺ កាលពី២៧០០ឆ្នាំមុនថា មនុស្សនិងធម្មជាតិគឺជាអង្គឯកភាពរួមគ្នា ដែលតែងបំពេញឱ្យគ្នាទៅវិញទៅមក ដោយមនុស្សជាតិរួមគ្នាចាត់ទុកថាគុណភាពនៃបរិស្ថានអេកូឡូស៊ី គឺជាគន្លឹះក្នុងការកសាងសង្គមមួយ ដែលមានវឌ្ឍនភាពលើគ្រប់វិស័យ។

ក្នុងន័យនេះ «ទឹកថ្លា ភ្នំបៃតង ជាភ្នំមាស ភ្នំប្រាក់» គឺជាមូលដ្ឋានគ្រឹះដ៏រឹងមាំក្នុងការចាក់បន្ថែមនូវភាពធន់មាំ ទៅក្នុងកិច្ចព្រមព្រៀងប៉ារីស ស្តីពីបម្រែបម្រួលអាកាសធាតុដែលបានចេញដំណើរតាំងពីឆ្នាំ២០១៥មក ឱ្យអនុវត្តសកម្មភាពរបស់ខ្លួន កាន់តែប្រសើរដោយមានប្រទេសចិនជាប្រតិបត្តិករ និងជាជើងឯកលើការការពារបរិស្ថានសកលនេះ ក្នុងពេលដែលប្រទេសចិនជា ទីតាំងពោរពេញដោយសន្តិភាព ភាពពេញលេញនៃសន្តិសុខ ភាពរីកចម្រើននៃនវានុវត្តបច្ចេកវិទ្យា និងភាពខ្លាំងមាំ នៃការអភិវឌ្ឍសេដ្ឋកិច្ច។

ជារួម «ទឹកថ្លា ភ្នំបៃតង ជាភ្នំមាស ភ្នំប្រាក់» ដែលបានចេញដំណើររយៈពេល២០ឆ្នាំនេះ បាននាំប្រទេសចិនស្អាតក្លាយជា គំរូភាពសកល ជាតំណាងរូបភាពបរិស្ថានពិភពលោក ជាបទពិសោធន៍នៃជីវៈចម្រុះ ដែលបណ្តាប្រទេសនានាកំពុងសិក្សារៀនសូត្រ និងជាគុណតម្លៃរបស់មនុស្សជាតិដែលប្រទេសចិន ដែលតែងបានខិតខំប្រឹងប្រែងដើម្បីឈានទៅរកយុគសម័យថ្មី នៃអរិយធម៌អេកូឡូស៊ីសង្គមនិយម ដោយបានចាក់បញ្ចូលទៅក្នុងស្មារតីរបស់មនុស្សជាតិ លើភាពដាច់ខាតនៃការការពារបរិស្ថាន និងពីការដណ្តើមយកជ័យជម្នះឱ្យខានតែបានលើ សមរភូមិនៃការបំពុលបរិស្ថាន ព្រមទាំងបង្កើនការដាក់ទោសទណ្ឌ ចំពោះឧក្រិដ្ឋកម្មលើបរិស្ថាន។ តាមរយៈការអញ្ជើញមកទស្សនាប្រទេសចិនដោយផ្ទាល់ នោះ ពិភពលោកនឹងយល់កាន់តែច្បាស់ ១០០%ពីការលើកកម្ពស់គុណភាពរស់នៅរបស់ប្រជាជាតិចិន ដែលនឹងក្លាយជាបទពិសោធន៍សកលសម្រាប់មនុស្សជាតិ ស្របតាមគោលការណ៍គ្រឹះនៃកិច្ចកសាងសហគមន៍ជោគវាសនារួម នៃមនុស្សជាតិដោយផ្តើមពីការជ្រោងទង់ទស្សនៈ «ទឹកថ្លា ភ្នំបៃតង ជាភ្នំមាស ភ្នំប្រាក់»៕

ដោយបណ្ឌិត ជា មុនីឫទ្ធិ
ប្រធានសមាគមអ្នកស្រាវជ្រាវវឌ្ឍនភាពកម្ពុជា-ចិន