(ព្រុចសែល)៖ នាយករដ្ឋមន្ត្រីប៉ូឡូញ លោក Donald Tusk បានថ្លែងថា សហរដ្ឋអាមេរិកបានសន្យាថា នឹងពិគ្រោះយោបល់ជាមួយអឺរ៉ុប មុនកិច្ចប្រជុំកំពូលជាមួយប្រធានាធិបតីរុស្ស៊ី លោក វ៉្លាឌីមៀ ពូទីន។ ការលើកឡើងនេះធ្វើឡើង ខណៈដែលរដ្ឋមន្ត្រីអឺរ៉ុបជាច្រើនកំពុងត្រៀមខ្លួនសម្រាប់កិច្ចពិភាក្សា ចំពេលមានការព្រួយបារម្ភថា ទីក្រុងវ៉ាស៊ីនតោនអាចនឹងបង្ខំឲ្យអ៊ុយក្រែនទទួលយកលក្ខខណ្ឌសន្តិភាពដែលមិនអំណោយផល។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters។

កាលពីសប្តាហ៍មុន ប្រធានាធិបតីអាមេរិក លោក ដូណាល់ ត្រាំ បានប្រកាសថា លោកនឹងជួបជាមួយលោក ពូទីន នៅថ្ងៃសុក្រ ក្នុងរដ្ឋអាឡាស្កា ដើម្បីចរចាបញ្ចប់សង្គ្រាមដែលអូសបន្លាយ ៣ឆ្នាំកន្លះមកហើយ។ ជាការឆ្លើយតប រដ្ឋមន្ត្រីការបរទេសសហភាពអឺរ៉ុបគ្រោងនឹងបើកសន្និសីទវីដេអូមួយនៅរសៀលថ្ងៃចន្ទ ដើម្បីពិភាក្សាពីការគាំទ្ររបស់ពួកគេចំពោះទីក្រុងកៀវ និងជំនួបនាពេលខាងមុខនេះ។

មន្ត្រីអឺរ៉ុបបានព្យាយាមបញ្ចុះបញ្ចូលជំហរ របស់សេតវិមានមុនកិច្ចចរចានៅអាឡាស្កា ដោយបានសង្កត់ធ្ងន់លើតម្រូវការ ក្នុងការការពារអធិបតេយ្យភាពរបស់អ៊ុយក្រែន, ការផ្តល់ការធានាសន្តិសុខ, និងការអនុញ្ញាតឲ្យទីក្រុងកៀវជ្រើសរើសផ្លូវដើរដោយខ្លួនឯង។ នាយករដ្ឋមន្ត្រីប៉ូឡូញ លោក Tusk បានថ្លែងថា «ខ្ញុំមានការភ័យខ្លាចជាច្រើន ប៉ុន្តែក៏មានក្តីសង្ឃឹមច្រើនផងដែរ»។

ប្រមុខគោលនយោបាយការបរទេសសហភាពអឺរ៉ុប លោកស្រី Kaja Kallas បានបញ្ជាក់ថា «កិច្ចព្រមព្រៀងណាមួយរវាងអាមេរិក និងរុស្ស៊ី ត្រូវតែមានការចូលរួមពីអ៊ុយក្រែន និងសហភាពអឺរ៉ុប ព្រោះវាជាបញ្ហាសន្តិសុខរបស់អ៊ុយក្រែន និងអឺរ៉ុបទាំងមូល»។ មេដឹកនាំអឺរ៉ុប ក៏បានគូសបញ្ជាក់ផងដែរពីគោលការណ៍ដែលថា ព្រំដែនអន្តរជាតិមិនអាចត្រូវបានផ្លាស់ប្តូរដោយកម្លាំងបានទេ ដោយសារតែពួកគេព្រួយបារម្ភថា កិច្ចព្រមព្រៀងដែលបង្ខំឲ្យទីក្រុងកៀវទទួលយក អាចនឹងបង្កើតគំរូដ៏គ្រោះថ្នាក់មួយ។

គួរបញ្ជាក់ថា មន្ត្រីគណៈកម្មការអឺរ៉ុបម្នាក់បានលើកឡើងថា រដ្ឋបាលអាមេរិកបានបង្ហាញចំណាប់អារម្មណ៍ ក្នុងការសម្របសម្រួលជំហរជាមួយអឺរ៉ុប។ លោកបានបន្ថែមថា «ការធានាសន្តិសុខដ៏រឹងមាំបំផុត គឺការដែលគ្មានការដាក់កម្រិតណាមួយលើកងកម្លាំងប្រដាប់អាវុធអ៊ុយក្រែន និងការគាំទ្រពីប្រទេសទីបីចំពោះអ៊ុយក្រែន»៕