(ប៉ារីស)៖ ប្រធានាធិបតីបារាំង លោក អេម៉ានុយអែល ម៉ាក្រុង កាលពីថ្ងៃចន្ទ បានរិះគន់យ៉ាងខ្លាំងទៅលើផែនការរបស់អ៉ីស្រាអែល ក្នុងការបង្កើនប្រតិបត្តិការយោធារបស់ខ្លួននៅតំបន់ហ្កាហ្សា ដោយចាត់ទុកថាជាគ្រោះមហន្តរាយដែលនឹងកើតឡើង ហើយបានស្នើឱ្យបង្កើតក្រុមចម្រុះអន្តរជាតិមួយក្រោមអាណត្តិរបស់អង្គការសហប្រជាជាតិ ដើម្បីធ្វើឱ្យមានស្ថិរភាពនៅតំបន់នេះ។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters។

កាលពីសប្តាហ៍មុន គណៈរដ្ឋមន្ត្រីសន្តិសុខរបស់អ៉ីស្រាអែល បានអនុម័តផែនការមួយដើម្បីគ្រប់គ្រងទីក្រុងហ្កាហ្សា (Gaza City) ដែលជាចំណាត់ការមួយពង្រីកប្រតិបត្តិការយោធារបស់ខ្លួននៅក្នុងទឹកដីប៉ាឡេស្ទីនដែលរងការបំផ្លិចបំផ្លាញ ហើយបានទាញឱ្យមានការរិះគន់យ៉ាងខ្លាំងទាំងក្នុងនិងក្រៅប្រទេស។

នៅក្នុងសេចក្តីថ្លែងការណ៍ដែលការិយាល័យរបស់លោកបានផ្ញើទៅកាន់អ្នកសារព័ត៌មាន លោក ម៉ាក្រុង បានមានប្រសាសន៍ថា «ការប្រកាសរបស់គណៈរដ្ឋមន្ត្រីអ៉ីស្រាអែលអំពីការពង្រីកប្រតិបត្តិការរបស់ខ្លួននៅទីក្រុងហ្កាហ្សា និងជំរំ Mawasi និងការត្រឡប់ទៅកាន់កាប់វិញ គឺជាការនាំទៅរកគ្រោះមហន្តរាយដ៏ធ្ងន់ធ្ងរមិនធ្លាប់មានពីមុនមក និងជាការឈានទៅរកសង្រ្គាមដែលគ្មានទីបញ្ចប់»។

លោក ម៉ាក្រុង បានបន្ថែមទៀតថា «ចំណាប់ខ្មាំងអ៉ីស្រាអែល និងប្រជាជននៅតំបន់ហ្កាហ្សា នឹងបន្តក្លាយជាជនរងគ្រោះចម្បងនៃយុទ្ធសាស្ត្រនេះ»៕