(មូស្គូ)៖ រុស្ស៊ីបានប្រកាសថា មនុស្ស ៣នាក់ត្រូវបានសម្លាប់ នៅក្នុងការវាយប្រហារដោយដ្រូនរបស់អ៊ុយក្រែនកាលពីយប់រំលងអធ្រាត្រ ដែលបានកំណត់គោលដៅលើតំបន់ចំនួនពីរ និងរដ្ឋធានីមូស្គូ។ នេះបើតាមការចុះផ្សាយ ដោយទីភ្នាក់ងារសារព័ត៌មាន Reuters។

មន្ត្រីរុស្ស៊ីបានបញ្ជាក់ថា មនុស្ស ២នាក់បានស្លាប់នៅតំបន់ Tula និងម្នាក់ទៀតនៅតំបន់ Nizhny Novgorod។ ជុំវិញការវាយប្រហារនេះ ភាគីអ៊ុយក្រែនបានបញ្ជាក់ថា ខ្លួនពិតជាបានកំណត់គោលដៅលើរោងចក្រផលិតគ្រឿងបង្គំមីស៊ីលមួយកន្លែងរបស់រុស្ស៊ីនៅតំបន់ Nizhny Novgorod ដែលផលិតគ្រឿងបន្លាស់សម្រាប់មីស៊ីលប្រភេទ Kh-32 និង Kh-101។

ក្រសួងការពារជាតិរុស្ស៊ីបានអះអាងថា អង្គភាពការពារដែនអាកាសរបស់ខ្លួនបានបំផ្លាញដ្រូនអ៊ុយក្រែនសរុបចំនួន ៥៩គ្រឿងកាលពីយប់មិញ ដែលក្នុងនោះមាន ១២គ្រឿងនៅតំបន់ Tula។ អភិបាលក្រុងមូស្គូ លោក Sergei Sobyanin បានឱ្យដឹងថា ដ្រូនចំនួន ៧គ្រឿង ត្រូវបានបាញ់ទម្លាក់ ខណៈកំពុងធ្វើដំណើរឆ្ពោះទៅកាន់រដ្ឋធានីរបស់រុស្ស៊ីកាលពីយប់មិញ និងព្រឹកថ្ងៃចន្ទ។

គួរបញ្ជាក់ថា ភាគីទាំងពីរតែងតែបដិសេធការកំណត់គោលដៅលើជនស៊ីវិល នៅក្នុងការវាយប្រហាររបស់ពួកគេទៅលើទឹកដីរបស់គ្នាទៅវិញទៅមក។ ទោះជាយ៉ាងណាក៏ដោយ ជនស៊ីវិលរាប់ពាន់នាក់បានស្លាប់នៅក្នុងសង្គ្រាមទ្រង់ទ្រាយធំ ដែលរុស្ស៊ីបានចាប់ផ្តើមនៅអ៊ុយក្រែនកាលពីខែកុម្ភៈ ឆ្នាំ២០២២៕