(សេអ៊ូល)៖ ប្រធានាធិបតីកូរ៉េខាងត្បូង លោក Lee Jae Myung និងប្រធានាធិបតីអាមេរិក លោក Donald Trump នឹងត្រូវចូលរួមក្នុងកិច្ចប្រជុំកំពូលជាលើកដំបូងរវាងមេដឹកនាំទាំង២ នៅថ្ងៃទី២៥ ខែសីហា ក្នុងទីក្រុងវ៉ាស៊ីនតោន ដើម្បីពិភាក្សាពីការពង្រឹងសម្ព័ន្ធភាពរវាងប្រទេសទាំង២ និងភាពជាដៃគូសន្តិសុខសេដ្ឋកិច្ច។ នេះបើតាមការបញ្ជាក់ពីការិយាល័យរបស់លោក Lee ដកស្រង់ចេញផ្សាយដោយទីភ្នាក់ងារសារព័ត៌មាន Reuters។

លោក Lee Jae Myung ដែលបានជាប់ឆ្នោតជាប្រធានាធិបតីកូរ៉េខាងត្បូង កាលពីខែមិថុនាកន្លងទៅ បានដាក់គោលដៅជាអាទិភាពកំពូលមួយដើម្បីជួយប្រទេសរបស់លោកដែលពឹងផ្អែក លើការនាំចេញ ហែលឆ្លងកាត់ការផ្លាស់ប្ដូរយ៉ាងសម្បើមនៅក្នុងបរិយាកាសពាណិជ្ជកម្មសកលបង្កឡើងដោយគោលនយោបាយពន្ធគយរបស់លោក Donald Trump។

នៅក្នុងសន្និសីទសារព័ត៌មានខ្លីមួយ អ្នកនាំពាក្យការិយាល័យប្រធានាធិបតីកូរ៉េខាងត្បូង លោកស្រី Kang Yu-jung បានឱ្យដឹងថាការអភិវឌ្ឍសម្ព័ន្ធភាពសន្តិសុខរវាងប្រទេសទាំង២ ឆ្ពោះទៅរកសម្ព័ន្ធភាពសន្តិសុខគ្រប់ជ្រុងជ្រោយ និងភាពជាដៃគូសន្តិសុខសេដ្ឋកិច្ច នឹងក្លាយជារបៀបវារៈសំខាន់ៗនៅក្នុងជំនួបរវាងលោក Lee Jae Myung និងលោក Donald Trump។ អ្នកនាំពាក្យរូបនេះបន្តថាដោយផ្អែកលើកិច្ចព្រមព្រៀងពន្ធគយដែលសម្រេចបានកាលពីខែកក្កដាកន្លងទៅ មេដឹកនាំទាំង២ នឹងខ្នះខ្នែងជំរុញការឆ្ពោះទៅមុខនៃភាពជាដៃគូមួយក្នុង វិស័យផលិតកម្ម ក្នុងនោះរួមមានបន្ទះឈីប ថ្មសម្រាប់ឧបករណ៍អេឡិចត្រូនិក និងការផលិតនាវា។

គួរបញ្ជាក់ថា លោក Donald Trump បានប្រកាសកាលពីថ្ងៃទី៣០​ ខែកក្កដា ថាសហរដ្ឋអាមេរិក និងកូរ៉េខាងត្បូងបានឈានដល់កិច្ចព្រមព្រៀងពាណិជ្ជកម្មមួយដោយលោកបានបញ្ចុះ ការយកពន្ធគយលើទំនិញនាំចូលពីកូរ៉េខាងត្បូងមកនៅត្រឹម ១៥ភាគរយ។ តាមលោក Trump កូរ៉េខាងត្បូងក៏នឹងប្រកាសផងដែរពីផែនការវិនិយោគនៅឯកិច្ចប្រជុំកំពូលនាពេលខាងមុខ ហើយថាទីក្រុងសេអ៊ូលបានសន្យាបោះទុនវិនិយោគ ៣៥០ពាន់លានដុល្លារនៅក្នុងសហរដ្ឋអាមេរិក៕