(វ៉ាស៊ីនតោន)៖ ប្រធានាធិបតីអាមេរិក លោក ដូណាល់ ត្រាំ នៅថ្ងៃចន្ទ ទី១១ ខែសីហា បាននិយាយថារូបលោកបានចេញបញ្ជាឱ្យដាក់ពង្រាយកងទ័ពឆ្មាំជាតិ ៨០០នាក់ ក្នុងរដ្ឋធានីវ៉ាស៊ីនតោន ហើយដាក់ឱ្យស្ថាប័នប៉ូលិសប្រចាំរដ្ឋធានីស្ថិតនៅក្រោមការគ្រប់គ្រងរបស់រដ្ឋាភិបាលសហព័ន្ធជាបណ្ដោះអាសន្ន។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters។

លោក ដូណាល់ ត្រាំ បានបញ្ជាក់ថាការសម្រេចចិត្តខាងលើរបស់លោកគឺជារឿងចាំបាច់ដើម្បីសង្រ្គោះរដ្ឋធានីវ៉ាស៊ីនតោនពីអំពើហិង្សា និងពួកឧក្រិដ្ឋជន បើទោះជាក្រុមមន្ត្រីប្រចាំរដ្ឋធានីអះអាងថា បទល្មើសហិង្សា និងឧក្រិដ្ឋកម្មបានថយចុះក៏ដោយ។ លោក ត្រាំ បានគូសបញ្ជាក់ក្នុងសន្និសីទសារព័ត៌មាននៅឯសេតវិមានដូច្នេះថា «រដ្ឋធានីរបស់យើងត្រូវបានគ្រប់គ្រងដោយពួកអន្ធពាល និងពួកឧក្រិដ្ឋជនដ៏សាហាវឃោរឃៅ។ នេះគឺជាទិវារំដោះនៅក្នុងរដ្ឋធានីវ៉ាស៊ីនតោន។ យើងនឹងរំដោះរដ្ឋធានីរបស់យើងមកវិញ»។

គួរបញ្ជាក់ថា នេះជាលើកទី២ ក្នុងរដូវក្ដៅនេះដែលលោក ដូណាល់ ត្រាំ បានដាក់ពង្រាយកងទ័ពឆ្មាំជាតិទៅកាន់តំបន់គ្រប់គ្រងដោយគណបក្សប្រជាធិបតេយ្យ។ ព្រមពេលជាមួយគ្នា សវនាការ កម្រិតសហព័ន្ធមួយបានចាប់ផ្ដើមធ្វើឡើងនៅថ្ងៃចន្ទសប្ដាហ៍នេះក្នុងទីក្រុង San Francisco ជុំវិញថាតើលោក ត្រាំ បានបំពានច្បាប់អាមេរិកដែរឬក៏យ៉ាងណា តាមរយៈការដាក់ពង្រាយកងទ័ពឆ្មាំជាតិ ទៅកាន់ទីក្រុង Los Angeles កាលពីខែមិថុនាកន្លងទៅដោយមិនមានការយល់ព្រមពីអភិបាលរដ្ឋ California លោក Gavin Newsom៕