(កៀវ)៖ ប្រធានាធិបតីអ៊ុយក្រែន លោក វ៉ូឡូឌីមៀ ហ្សេលេនស្គី បាននិយាយថាលោកប្រធានាធិបតីរុស្ស៉ី វ្ល៉ាឌីមៀ ពូទីន មិនមែនកំពុងត្រៀមលក្ខខណៈសម្រាប់បទឈប់បាញ់នោះទេ តែផ្ទុយទៅវិញ លោកកំពុងត្រៀមលក្ខណៈបញ្ជាឱ្យកងទ័ពរុស្ស៉ីបើកប្រតិបត្តិការវាយលុកថ្មីមួយនៅអ៊ុយក្រែន បើទោះជារូបលោកគ្រោងនឹងជួបលោកប្រធានាធិបតីអាមេរិក ដូណាល់ ត្រាំ ក្នុងកិច្ចចរចាសន្តិភាព នៅរដ្ឋ Alaska ក៏ដោយ។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters។

លោក ហ្សេលេនស្គី ធ្វើការកត់សម្គាល់បែបនេះបន្ទាប់ពីរូបលោកបានបើកកិច្ចសន្ទនាតាមទូរស័ព្ទជាមួយមេដឹកនាំឥណ្ឌា និងអារ៉ាប៊ីសាអូឌីតកាលពីថ្ងៃចន្ទ ទី១១​ ខែសីហា។ ដោយផ្អែកលើព័ត៌មានទទួល បានពីចារកម្ម និងក្រុមមេបញ្ជាការអ៊ុយក្រែន លោក ហ្សេលេនស្គីបានឱ្យដឹងថាលោក ពូទីន មានបំណងបង្ហាញឱ្យគេគ្រប់គ្នាបានឃើញថាកិច្ចប្រជុំរបស់លោកជាមួយលោក ត្រាំ នៅថ្ងៃសុក្រសប្ដាហ៍នេះ គឺជាជ័យជម្នះផ្ទាល់ខ្លួនមួយរបស់លោក។ «លោក ពូទីនពិតណាស់មិនមែនកំពុងត្រៀមលក្ខណៈសម្រាប់បទឈប់បាញ់ ឬបិទបញ្ចប់សង្រ្គាមនោះទេ។ តែផ្ទុយទៅវិញ កងទ័ពរុស្ស៉ីកំពុងត្រៀមលក្ខណៈ ដើម្បីបើកការវាយលុកជាថ្មី»។ នេះជាការលើកឡើងរបស់លោក ហ្សេលេនស្គី ក្នុងវីដេអូមួយបង្ហោះលើបណ្ដាញទំនាក់ទំនងសង្គម។

គួរបញ្ជាក់ថា លោក Vladyslav Voloshyn ជាអ្នកនាំពាក្យយោធាអ៊ុយក្រែនប្រចាំសមរភូមិភាគខាងត្បូងនៃប្រទេស បានប្រាប់ទីភ្នាក់ងារសារព័ត៌មាន​ Reuters​ កាលពីថ្ងៃចន្ទថារុស្ស៉ីបានចល័តកងទ័ព មួយចំនួនរបស់ក្នុងតំបន់ Zaporizhzhia ដើម្បីត្រៀមលក្ខណៈបើកការវាយលុកសាជាថ្មី៕