(ប៉េកាំង)៖ អំឡុងកិច្ចសន្ទនាតាមទូរសព្ទនាថ្ងៃអង្គារ ទី១២ ខែសីហា ប្រធានាធិបតីចិន លោក ស៉ី ជីនពីង បានប្រាប់សមភាគីប្រេស៉ីល លោក Luiz Inacio Lula da Silva ថាប្រទេសទាំងពីរអាចដើរតួនាទីធ្វើជាគំរូនៃខ្លួនទីពឹងខ្លួន សម្រាប់ក្រុមប្រទេសលោកខាងត្បូង ឬ Global South។ នេះបើតាមការចេញផ្សាយដោយ ទីភ្នាក់ងារព័ត៌មាន AFP។

លោក ស៉ី ជីនពីង បាននិយាយថា ប្រទេសចិននឹងរួមសហការជាមួយប្រេស៉ីល ដើម្បីធ្វើជាឧទាហរណ៍គំរូនៃសាមគ្គី និងការពឹងពាក់លើខ្លួនឯង សម្រាប់ក្រុមប្រទេស Global South ហើយរួមគ្នាកសាងពិភពលោកមួយ ដែលមានយុត្តិធម៌និងនិរន្តរភាពជាងមុន។ លោក ស៉ី បានបន្តថា ប្រទេសទាំងអស់គួរតែរួបរួមគ្នាប្រឆាំងឱ្យមុតមាំចំពោះឯកតោភាគីនិយម និងគាំពារនិយម ដែលហាក់ចំសំដៅលើចំណាត់ការពន្ធគយរបស់សហរដ្ឋអាមេរិក។

រីឯបើតាមសេចក្តីថ្លែងការណ៍ពីការិយាល័យប្រធានាធិបតីប្រេស៉ីល អំឡុងកិច្ចសន្ទនាទូរសព្ទនោះ លោក ស៉ី និងលោក Lula បានឯកភាពគ្នាលើតួនាទីរបស់ក្រុម G20 និងក្រុម BRICS ក្នុងការការពារពហុភាគីនិយម។ ជាមួយគ្នានោះ មេដឹកនាំទាំងពីរ ក៏បានប្តេជ្ញាផងដែរថា នឹងពង្រីកវិសាលភាពនៃកិច្ចសហប្រតិបត្តិការ នៅក្នុងវិស័យផ្សេងៗ រួមមានទាំងសុខាភិបាល ប្រេងនិងឧស្ម័ន សេដ្ឋកិច្ចឌីជីថល និងផ្កាយរណប។

គួរបញ្ជាក់ថា ប៉ុន្មានខែកន្លងមកនេះ លោក ស៉ី និងលោក Lula បានព្យាយាមលើកកម្ពស់ចិននិងប្រេស៉ីលក្នុងនាមជាប្រទេស ដែលការពារយ៉ាងរឹងមាំចំពោះប្រព័ន្ធពាណិជ្ជកម្មពហុភាគី ដែលផ្ទុយស្រឡះពីវិធានការដំឡើងពន្ធគយខ្ពស់លើបណ្តាប្រទេសនានា របស់ប្រធានាធិបតីអាមេរិក លោក ដូណាល់ ត្រាំ៕