(ព្រុចសែល)៖ ខណៈសល់៣ថ្ងៃទៀត ប្រធានាធិបតីអាមេរិក លោក ដូណាល់ ត្រាំ នឹងត្រូវជួបមុខផ្ទាល់ជាមួយប្រធានាធិបតីរុស្ស៉ី លោក វ៉្លាឌីមៀ ពូទីន ក្រុមមេដឹកនាំសហភាពអឺរ៉ុប (EU) នាថ្ងៃអង្គារ ទី១២ ខែសីហា បាននាំគ្នាសង្កត់ធ្ងន់អំពីសិទ្ធិរបស់អ៊ុយក្រែន ក្នុងការជ្រើសរើសជោគវាសនាខ្លួនឯង។ នេះបើតាមការចេញផ្សាយដោយ ទីភ្នាក់ងារព័ត៌មាន AFP។

ក្រុមមេដឹកនាំ EU បាននិយាយក្នុងសេចក្តីថ្លែងការណ៍ថា «ពួកយើងក្នុងនាមជាមេដឹកនាំនៃសហភាពអឺរ៉ុប ស្វាគមន៍កិច្ចប្រឹងប្រែង​របស់លោកប្រធានាធិបតី ត្រាំ ដែលសំដៅទៅរកការបិទបញ្ចប់សង្រ្គាមឈ្លានពានរបស់រុស្ស៉ីប្រឆាំងអ៊ុយក្រែន និងការសម្រេចឱ្យបាន​សន្តិភាពនិងសន្តិសុខ ប្រកបដោយភាពយុត្តិធម៌ និងឋិតថេរយូរអង្វែង»។

សេចក្តីថ្លែងការណ៍បានបន្តថា «សន្តិភាពយុត្តិធម៌និងឋិតថេរយូរអង្វែង ដែលនាំមកនូវស្ថិរភាពនិងសន្តិសុខ ចាំបាច់ត្រូវតែគោរព​ច្បាប់អន្តរជាតិ ក្នុងនោះរាប់បញ្ចូលទាំង គោលការណ៍នៃឯករាជ្យភាព អធិបតេយ្យភាព និងបូរណភាពទឹកដី ហើយព្រំប្រទល់អន្តរជាតិ ដាច់ខាតមិនត្រូវផ្លាស់ប្តូរដោយកម្លាំងឬការបង្ខិតបង្ខំឡើយ»។ ប្រធានាធិបតីអ៊ុយក្រែន លោក វ៉ូឡូឌីមៀ ហ្សេលេនស្គី រួមទាំងក្រុមមេដឹកនាំអឺរ៉ុប នឹងត្រូវជួបសន្ទនា​ជាមួយលោក ត្រាំ នាថ្ងៃពុធសប្តាហ៍នេះ។

គួរបញ្ជាក់ថា ជំនួបតទល់រវាងលោក ត្រាំ និងលោក ពូទីន គ្រោងធ្វើឡើងនៅរដ្ឋ Alaska របស់សហរដ្ឋអាមេរិក នាថ្ងៃសុក្រ ទី១៥ ខែសីហា។ លោក ត្រាំ បានលើកឡើងថា ដើម្បីបញ្ចប់សង្រ្គាមនិងសម្រេចបានសន្តិភាព រុស្ស៉ីនិងអ៊ុយក្រែនចាំបាច់ត្រូវដោះដូរទឹកដីគ្នា ប៉ុន្តែលោក ហ្សេលេនស្គី បានច្រានចោលលទ្ធភាពនៃការបោះបង់ទឹកដី ដែលរុស្ស៉ីបានដណ្តើមយកទៅគ្រប់គ្រង៕